സിപിഐ എം താലൂക്ക് ഓഫീസ് ഉപരോധസമരം ചരിത്രത്തില് ഇടംനേടുന്നു
സംസ്ഥാനത്തെ 63 താലൂക്ക് കേന്ദ്രത്തിലായി തിങ്കളാഴ്ച ആരംഭിച്ച ഉപരോധത്തില് ഇതിനകം അഞ്ചുലക്ഷത്തിലധികം വളന്റിയര്മാര് പങ്കെടുത്തു. കേന്ദ്ര-സംസ്ഥാന സര്ക്കാരുകളുടെ കൊള്ളരുതാത്ത ഭരണത്തെയും നയങ്ങളെയും കടപുഴക്കാനുള്ള ജനകീയ ഇച്ഛയാണ് ദേശീയപ്രക്ഷോഭത്തിന്റെ ഭാഗമായ ഉപരോധസമരത്തില് അലയടിച്ചത്. ശനിയാഴ്ചയും ഉപരോധം തുടരും. നാടിനെ പട്ടിണിയിലേക്കും വറുതിയിലേക്കും കുഞ്ഞുങ്ങളുടെ കൂട്ടമരണത്തിലേക്കും പകര്ച്ചവ്യാധികളിലേക്കും വലിച്ചെറിഞ്ഞ ഭരണനയങ്ങള് തടയാനാണ് പ്രക്ഷോഭം. ഇത് ദേശീയമായും സംസ്ഥാനതലത്തിലും കുറെയധികം കാലമായി പടരുന്ന ഭരണവിരുദ്ധവികാരത്തിന്റെ ആളിക്കത്തലാണ്. സമരംകൊണ്ട് എന്ത് പ്രയോജനം എന്ന് ചോദിക്കുന്നവരുടെ കണ്ണുതുറപ്പിക്കുന്നതാണ് കേരളത്തിലടക്കം നടക്കുന്ന പ്രക്ഷോഭങ്ങളുടെ അനന്തരഫലം. പാചകവാതക സിലിണ്ടര് വെട്ടിക്കുറച്ച കേന്ദ്രനടപടിക്കെതിരെ കേരളത്തില് അടുപ്പുക്കൂട്ടി സമരം നടത്തിയപ്പോള് അത് സാര്വദേശിയമായ പ്രതികരണമുണ്ടാക്കി. …














