തിരുവനന്തപുരം: പ്രായാധിക്യമുള്ളവരിലും വാക്‌സിൻ എടുക്കാത്തവരിലും മറ്റ് രോ​ഗങ്ങൾ ഉള്ളവരിലും ഒമിക്രോൺ വകഭേദം തീവ്രമാകുമെന്ന് സംസ്ഥാന കൊവിഡ് വിദ​ഗ്ധ സമിതി. ജനസാന്ദ്രത കൂടുതലായതിനാൽ, വേണ്ടത്ര ശ്രദ്ധിച്ചില്ലെങ്കിൽ കേരളത്തിൽ അതിവേഗം രോഗം പടർന്ന് പിടിക്കാൻ സാധ്യതയുണ്ട്. അപകടസാധ്യതയുള്ളവർ  (പ്രായാധിക്യമുള്ളവർ, പ്രമേഹം തുടങ്ങിയ അനുബന്ധരോഗങ്ങളുള്ളവർ)  കേരളത്തിൽ കൂടുതലാണെന്നും ഓർത്തിരിക്കേണ്ടതാണെന്നും വിദ​ഗ്ധ സമിതി തലവൻ ഡോ ബി ഇക്ബാൽ പറഞ്ഞു.  

മാസ്ക് ധാരണം, ആൾക്കൂട്ട സന്ദർഭങ്ങൾ ഒഴിവാക്കൽ, അടഞ്ഞ മുറികളിലെ  (പ്രത്യേകിച്ച് എ സി മുറികളിലെ) വായുസഞ്ചാരം ഉറപ്പാക്കൽ ഇവയാണ് കരുതൽ നടപടികളിൽ പ്രധാനമായും ശ്രദ്ധിക്കാനുള്ളത്.  കഴിഞ്ഞ ഏതാനും ദിവസത്തെ അനുഭവത്തിൽ കാണാൻ കഴിഞ്ഞത് പല സർക്കാർ, അർധസർക്കാർ, സ്വയംഭരണ സ്ഥാപനങ്ങളിൽ പോലും നിരവധി യോഗങ്ങൾ അടഞ്ഞ ഏ സി മുറികളിൽ നടക്കുന്നതായാണ്.

ഇതുടൻ അവസാനിപ്പിക്കണം. ജനാലകൾ തുറന്നിട്ട് വായുസഞ്ചാരം ഉറപ്പാക്കാൻ കഴിയാത്ത മുറികളിലും ഹോളുകളിലൂമുള്ള മീറ്റിംഗുകളും ചടങ്ങുകളും പൂർണ്ണമായും ഒഴിവാക്കണം.  അത് പോലെ ഇപ്പോൾ തുറന്ന് പ്രവർത്തിക്കുന്ന കടകളിൽ ജനാലകളില്ലെങ്കിൽ വാതിലുകളെങ്കിലും തുറന്നിട്ട് വായുസഞ്ചാരം ഉറപ്പാക്കേണ്ടതാണെന്നും വിദ​ഗ്ധ സമിതി മുന്നറിയിപ്പ് നൽകുന്നു.