ശ്രീകൃഷ്ണപുരം എന്‍ജിനീയറിങ് കോളെജില്‍ പുതുതായി നിര്‍മ്മിച്ച ഇലക്ട്രിക്കല്‍ എന്‍ജിനീയറിങ് ബ്ലോക്ക്, സ്റ്റാഫ് ക്വാര്‍ട്ടേഴ്സ് എന്നിവയുടെ ഉദ്ഘാടനം നാളെ (മെയ് 15) രാവിലെ 11.30 ന് മുഖ്യമന്ത്രി പിണറായി വിജയന്‍ നിര്‍വഹിക്കും. ഉന്നത വിദ്യാഭ്യാസ വകുപ്പ് മന്ത്രി ഡോ. ആര്‍. ബിന്ദു അധ്യക്ഷയാവും. മഴവെള്ള സംഭരണിയുടെ ഉദ്ഘാടനം മന്ത്രി ആര്‍. ബിന്ദു നിര്‍വഹിക്കും. വി.കെ. ശ്രീകണ്ഠന്‍ എം.പി., ജില്ലാ പഞ്ചായത്ത് പ്രസിഡന്റ് കെ. ബിനുമോള്‍ എന്നിവര്‍ മുഖ്യാതിഥികളാവും. അഡ്വ. കെ. പ്രേംകുമാര്‍ എം.എല്‍.എ, ശ്രീകൃഷ്ണപുരം ബ്ലോക്ക് പഞ്ചായത്ത് പ്രസിഡന്റ് സുനിത ജോസഫ്, ശ്രീകൃഷ്ണപുരം ഗ്രാമപഞ്ചായത്ത് പ്രസിഡന്റ് സി. രാജിക, ജില്ലാ പഞ്ചായത്തംഗം കെ. ശ്രീധരന്‍, ബ്ലോക്ക് പഞ്ചായത്ത് വികസന സ്റ്റാന്‍ഡിങ് കമ്മിറ്റി ചെയര്‍പേഴ്സണ്‍ വി.കെ. രാധിക, ഗ്രാമപഞ്ചായത്ത് ക്ഷേമകാര്യ സ്റ്റാന്‍ഡിങ് കമ്മിറ്റി ചെയര്‍മാന്‍ ഹരിദാസന്‍, ഗ്രാമപഞ്ചായത്തംഗം ലിനി, ജില്ലാ കലക്ടര്‍ ഡോ. എസ്. ചിത്ര, പാലക്കാട് പി.ഡബ്ല്യു.ഡി. എക്സി. എന്‍ജിനീയര്‍ സി. രാജേഷ് ചന്ദ്രന്‍, വിവിധ രാഷ്ട്രീയ പാര്‍ട്ടി പ്രതിനിധികള്‍ തുടങ്ങിയവര്‍ പങ്കെടുക്കും.

*ഇലക്ട്രിക്കല്‍ എന്‍ജിനീയറിങ് ബ്ലോക്ക്*

4500 ചതുരശ്ര മീറ്റര്‍ വിസ്തീര്‍ണത്തില്‍ 8.57 കോടി രൂപ ചെലവഴിച്ച് നാല് നിലകളിലായാണ് ബ്ലോക്ക് നിര്‍മ്മിച്ചിരിക്കുന്നത്. സെല്ലാര്‍ ഫ്ളോറില്‍ പാര്‍ക്കിങ് ഏരിയ, ജനറേറ്റര്‍ റൂം, സ്പോര്‍ട്സ് സ്റ്റോര്‍, ജനറല്‍ സ്റ്റോര്‍ എന്നിവയും മൂന്ന് നിലകളിലായി ഏഴ് ലാബുകളും നാല് ക്ലാസ് മുറികളും രണ്ട് ടെക്നിക്കല്‍ ക്ലാസ് മുറികളും എട്ട് സ്റ്റാഫ് മുറികളും ഗാലറി, കോണ്‍ഫറന്‍സ് ഹാള്‍, സെമിനാര്‍ ഹാള്‍, ആണ്‍കുട്ടികള്‍ക്കും പെണ്‍കുട്ടികള്‍ക്കും പ്രത്യേകം വിശ്രമ മുറികള്‍, ഇടനാഴികള്‍, ശുചിമുറികള്‍, സ്റ്റെയര്‍ റൂം, ലിഫ്റ്റ് സൗകര്യം എന്നിവ പൂര്‍ത്തീകരിച്ചിട്ടുണ്ട്. ഇതിനുപുറമേ 81 ലക്ഷം രൂപ ചെലവഴിച്ച് മഴവെള്ള സംഭരണിയും നിര്‍മ്മിച്ചിട്ടുണ്ട്.

*സ്റ്റാഫ് ക്വാര്‍ട്ടേഴ്സ്*

അഞ്ച് നിലകളിലായി 7.30 കോടി രൂപ ചെലവില്‍ 2385.77 ചതുരശ്ര മീറ്റര്‍ വിസ്തീര്‍ണത്തിലാണ് സ്റ്റാഫ് ക്വാര്‍ട്ടേഴ്സ് നിര്‍മ്മിച്ചിരിക്കുന്നത്. ഓരോ നിലകളിലും നാല് വീതം 20 ക്വാര്‍ട്ടേഴ്സുകളും ഓരോ ക്വാര്‍ട്ടേഴ്സിലും രണ്ട് കിടപ്പുമുറി, ഡ്രോയിങ് റൂം, അടുക്കള, ശുചിമുറി, വരാന്ത എന്നിവയും ഇടനാഴിയും ജനറേറ്റര്‍ റൂം, സ്റ്റെയര്‍ കൂടാതെ ലിഫ്റ്റ് സൗകര്യവും സജ്ജീകരിച്ചിട്ടുണ്ട്. കെട്ടിടത്തിന്റെ ഇലക്ട്രിക്കല്‍ പ്രവര്‍ത്തി, ലിഫ്റ്റ്, ഫയര്‍വര്‍ക്ക് എന്നിവയും പൂര്‍ത്തീകരിച്ചിട്ടുണ്ട്.