വെള്ളിനേഴി:. പാരമ്പര്യ കലകളുടെയും കലാകാരന്മാരുടെയും നാടായ വെള്ളിനേഴിയെ ആഗോള സാംസ്കാരിക ഭൂപടത്തിൽ അടയാളപ്പെടുത്തുക എന്ന ലക്ഷ്യത്തോടെ കൊട്ടിഘോഷിച്ച് നടപ്പിലാക്കിയ ‘വെള്ളിനേഴി കലാഗ്രാമം’ പദ്ധതി നിലച്ചു. ലക്ഷങ്ങൾ ചെലവഴിച്ച് നിർമ്മിച്ച കെട്ടിടം മാത്രമായി കലാഗ്രാമം ചുരുങ്ങിയതോടെ പദ്ധതിയുടെ തുടർപ്രവർത്തനങ്ങൾ എന്നെന്നേക്കുമായി വഴിമുട്ടിയ അവസ്ഥയിലാണ്.
കഥകളി, തുള്ളൽ, വാദ്യകലകൾ തുടങ്ങിയ വിവിധ സാംസ്കാരിക പാരമ്പര്യങ്ങളുടെ കേന്ദ്രമായ വെള്ളിനേഴിയുടെ പെരുമ വീണ്ടെടുക്കാനും, കലാസ്നേഹികളെയും സഞ്ചാരികളെയും ആകർഷിക്കാനും ലക്ഷ്യമിട്ടാണ് കലാഗ്രാമത്തിന് തറക്കല്ലിട്ടത്. പദ്ധതിയുടെ ആദ്യഘട്ടമെന്ന നിലയിൽ കെട്ടിട നിർമ്മാണം പൂർത്തിയാക്കുകയും വലിയ ആഘോഷങ്ങളോടെ അത് നാടിന് സമർപ്പിക്കുകയും ചെയ്തിരുന്നു. എന്നാൽ ഉദ്ഘാടനത്തിന് ശേഷം ഇങ്ങോട്ട് യാതൊരുവിധ തുടർപ്രവർത്തനങ്ങളും ഇവിടെ നടന്നിട്ടില്ലെന്ന് നാട്ടുകാരും കലാസ്നേഹികളും ഒരുപോലെ പരാതിപ്പെടുന്നു.
പ്രതീക്ഷകൾ തകർന്ന് കലാകാരന്മാർ
നാടൻ കലകളുടെ പഠനകേന്ദ്രം, സാംസ്കാരിക ശിൽപശാലകൾ, കലാകാരന്മാർക്കുള്ള താമസം, സ്ഥിരം അവതരണ വേദികൾ എന്നിവയെല്ലാം കലാഗ്രാമത്തിന്റെ ഭാഗമായി ഉയർന്നുവരുമെന്നാണ് വാഗ്ദാനം ചെയ്തിരുന്നത്. എന്നാൽ നിർമ്മിച്ച കെട്ടിടം ആർക്കും പ്രയോജനമില്ലാതെ കിടന്ന് നശിക്കുന്ന അവസ്ഥയിലാണ്. ലക്ഷങ്ങൾ മുടക്കി നിർമ്മിച്ച കെട്ടിടത്തിന്റെ പരിപാലനം പോലും ഇപ്പോൾ നടക്കുന്നില്ല.
വെള്ളിനേഴിയുടെ ചരിത്രവും പാരമ്പര്യവും വരുംതലമുറയ്ക്ക് പകർന്നുനൽകാൻ വലിയൊരു കേന്ദ്രമാകുമെന്ന് കരുതിയ കലാഗ്രാമം, ഇന്ന് അധികൃതരുടെ അനാസ്ഥയുടെ പ്രതീകമായി നിൽക്കുന്നത് സങ്കടകരമാണ്. പദ്ധതിക്കായി നീക്കിവെച്ച ഫണ്ടും വാഗ്ദാനങ്ങളും എവിടെപ്പോയെന്ന് വ്യക്തമാക്കണം.” പ്രദേശവാസിയായ ഒരു കലാസ്നേഹി
അടിയന്തര ഇടപെടൽ വേണം
കലകളുടെ ഗ്രാമമെന്ന പദവി നിലനിർത്താൻ വെള്ളിനേഴിക്ക് അർഹമായ പരിഗണന ലഭിക്കേണ്ടതുണ്ട്. പദ്ധതി പൂർണ്ണതോതിൽ നടപ്പിലാക്കാനും, കെട്ടിടം കലാപ്രവർത്തനങ്ങൾക്കായി തുറന്നുകൊടുക്കാനും ടൂറിസം-സാംസ്കാരിക വകുപ്പുകളും ജനപ്രതിനിധികളും അടിയന്തരമായി ഇടപെടണമെന്നാണ് നാട്ടുകാരുടെ ആവശ്യം. അല്ലാത്തപക്ഷം ശക്തമായ ജനകീയ പ്രതിഷേധങ്ങളുമായി മുന്നോട്ടുപോകാനാണ് പ്രദേശവാസികളുടെ തീരുമാനം.
അനുഗ്രഹ വിഷൻ ന്യൂസ്,