കൊച്ചി: മറൈൻ ഡ്രൈവിലെ ഫ്ലാറ്റ് സമുച്ചയത്തിൽ തീപിടിത്തം. മറൈൻ ഡ്രൈവിലെ സമുദ്രദർശൻ അപ്പാർട്ട്മെന്റിന്റെ ബേസ്മെന്റ് പാർക്കിങ് ഏരിയയിലാണ് ഞായറാഴ്ച ഉച്ചയോടെ തീപിടിത്തമുണ്ടായത്. തീ നിയന്ത്രണവിധേയമാക്കിയെങ്കിലും കെട്ടിടത്തിനുള്ളിൽ കനത്ത പുക നിറഞ്ഞതിനാൽ രക്ഷാപ്രവർത്തനങ്ങളും പുക നീക്കാനുള്ള നടപടികളും തുടരുകയാണ്.
തീപിടിത്തമുണ്ടായ വിവരം ലഭിച്ചതിനെ തുടർന്ന് ഫയർ ആൻഡ് റെസ്ക്യൂ സംഘം സ്ഥലത്തെത്തി. ഗാന്ധിനഗർ, ക്ലബ് റോഡ് ഫയർ സ്റ്റേഷനുകളിൽ നിന്നുള്ള നാല് യൂണിറ്റുകൾ സ്ഥലത്തെത്തി തീയണക്കുന്നതിനും പുക നീക്കം ചെയ്യുന്നതിനുമുള്ള പ്രവർത്തനങ്ങളിൽ ഏർപ്പെട്ടു.
തീ നിയന്ത്രണവിധേയമാക്കിയെങ്കിലും ബേസ്മെന്റിൽ കനത്ത പുക നിറഞ്ഞത് രക്ഷാപ്രവർത്തനത്തിന് തടസ്സമായി. പുക പുറത്തേക്ക് നീക്കുന്നതിനായി ഗാന്ധിനഗർ ഫയർ സ്റ്റേഷനിൽ നിന്നുള്ള ബ്ലോവർ എത്തിച്ച് പ്രവർത്തനം ആരംഭിച്ചിട്ടുണ്ട്.
പുക പൂർണമായും നീങ്ങിയ ശേഷമേ തീപിടിത്തത്തെ തുടർന്നുണ്ടായ നാശനഷ്ടങ്ങളുടെ തോത് കൃത്യമായി വിലയിരുത്താൻ കഴിയൂ എന്നാണ് ഫയർ ആൻഡ് റെസ്ക്യൂ അധികൃതർ അറിയിച്ചത്. തീപിടിത്തത്തിന്റെ കാരണം സംബന്ധിച്ച കൂടുതൽ വിവരങ്ങൾ ലഭ്യമായിട്ടില്ല.
തീപിടിത്തത്തിൽ ആളപായമുണ്ടായോ, ഫ്ലാറ്റിലെ താമസക്കാരെ ഒഴിപ്പിച്ചിട്ടുണ്ടോ തുടങ്ങിയ വിവരങ്ങൾ അധികൃതർ സ്ഥിരീകരിക്കുന്നതിനായി കാത്തിരിക്കുകയാണ്.
വാർത്ത: അനുഗ്രഹ വിഷൻ ന്യൂസ്