കൊച്ചി: മലയാളികളുടെ പ്രിയ ഗായികയും അവതാരകയുമായ റിമി ടോമി പുതിയൊരു ജീവിതത്തിലേക്ക് കടക്കാനൊരുങ്ങുന്നതായുള്ള വാർത്തകൾ സോഷ്യൽ മീഡിയയിൽ ശ്രദ്ധ നേടുന്നു. വ്യക്തിജീവിതത്തിലെ പുതിയ സന്തോഷവാർത്ത ആരാധകരുമായി പങ്കുവെച്ചതോടെ റിമിയുടെ ജീവിതയാത്രയും മുൻപ് നടത്തിയ അഭിമുഖങ്ങളിലെ തുറന്നുപറച്ചിലുകളും വീണ്ടും ചർച്ചയാകുകയാണ്.
ആദ്യ വിവാഹബന്ധം വേർപിരിഞ്ഞ് വർഷങ്ങൾക്കുശേഷം ജീവിതത്തെ പുതിയ കാഴ്ചപ്പാടോടെ കാണാൻ തുടങ്ങിയ റിമി, സന്തോഷമാണ് ജീവിതത്തിൽ ഏറ്റവും പ്രധാനമെന്ന് പല അഭിമുഖങ്ങളിലും വ്യക്തമാക്കിയിട്ടുണ്ട്. പണമോ പ്രശസ്തിയോ മാത്രമല്ല ജീവിതത്തിലെ സന്തോഷമെന്നും, സ്വന്തമായി അധ്വാനിച്ച് നേടിയ നേട്ടങ്ങളിൽ അഭിമാനമുണ്ടെന്നും താരം പറഞ്ഞിരുന്നു.
പിന്നണി ഗാനരംഗത്തിലൂടെ ശ്രദ്ധ നേടിയ റിമി ടോമി പിന്നീട് സ്റ്റേജ് ഷോകളിലൂടെയും ടെലിവിഷൻ പരിപാടികളിലൂടെയും മലയാളികളുടെ പ്രിയതാരമായി മാറി. സാധാരണ കുടുംബപശ്ചാത്തലത്തിൽ നിന്ന് എത്തിയ റിമി ഇന്ന് സ്വന്തം അധ്വാനത്തിലൂടെ ജീവിതം കെട്ടിപ്പടുത്ത വ്യക്തിത്വമാണ്.
തന്റെ ജീവിതത്തെക്കുറിച്ച് സംസാരിക്കവെ റിമി ഒരിക്കൽ പറഞ്ഞ വാക്കുകൾ ഇങ്ങനെ:
- “ഞാൻ പണ്ടത്തേക്കാൾ ഒരുപാട് ഹാപ്പിയായാണ് ജീവിക്കുന്നത്. വീടിന് പകരം വീടുകളായി. കാറിന് പകരം കാറുകളായി. വീട്ടുകാർക്കെല്ലാം ഹെൽപ്പ് ചെയ്യാൻ പറ്റി. അ
നിയത്തിയെ വളരെ ഭംഗിയായി കല്യാണം കഴിപ്പിച്ചു.”
കരിയറിന്റെ തുടക്കകാലത്ത് അഞ്ചുവർഷം മാത്രമേ ഈ രംഗത്ത് തുടരാൻ കഴിയൂ എന്നാണ് കരുതിയിരുന്നതെന്നും എന്നാൽ ഇത്രയും വർഷങ്ങൾ ഈ മേഖലയിൽ തുടരാൻ കഴിഞ്ഞത് ജീവിതത്തിലെ വലിയ അനുഗ്രഹമാണെന്നും റിമി പറഞ്ഞിട്ടുണ്ട്.
“ഇനിയാരും വിളിച്ചില്ലെങ്കിലും അത്യാവശ്യം ജീവിക്കാനുള്ളതൊക്കെ ഞാനുണ്ടാക്കിയിട്ടുണ്ട്” എന്ന റിമിയുടെ വാക്കുകളിൽ സ്വന്തം അധ്വാനത്തിലൂടെ സാമ്പത്തിക സുരക്ഷിതത്വം നേടിയെടുത്തതിന്റെ ആത്മവിശ്വാസം പ്രകടമാണ്.
പണത്തിന്റെ കാര്യത്തിൽ കണിശക്കാരി
പരിപാടികൾക്ക് ലഭിക്കുന്ന പ്രതിഫലത്തിന്റെ കാര്യത്തിൽ താൻ വ്യക്തമായ നിലപാട് സ്വീകരിക്കുന്ന ആളാണെന്നും റിമി തുറന്നുപറഞ്ഞിട്ടുണ്ട്. വലിയ താരങ്ങൾക്കുവേണ്ടി മാനേജർമാരോ കുടുംബാംഗങ്ങളോ പ്രതിഫലത്തിന്റെ കാര്യങ്ങൾ സംസാരിക്കാറുണ്ടെന്നും അതുപോലെ ഇപ്പോൾ തന്റെ കാര്യങ്ങളിൽ പലതും കുടുംബാംഗങ്ങളെ ഏൽപ്പിച്ചിട്ടുണ്ടെന്നും താരം വ്യക്തമാക്കിയിരുന്നു.
പ്രതിഫലം കുറയ്ക്കണമെന്ന ആവശ്യത്തോടുള്ള തന്റെ സമീപനത്തെക്കുറിച്ചും റിമി തമാശരൂപത്തിൽ പറഞ്ഞ വാക്കുകൾ ഏറെ ശ്രദ്ധിക്കപ്പെട്ടിരുന്നു.
“ഞാൻ മാത്രം മദർ തെരേസയാകേണ്ട. എല്ലാവരും ചെയ്യുന്നുണ്ട്. പണത്തിന്റെ കാര്യത്തിൽ റിമി കണിശക്കാരിയാണെന്ന് പറയാറുണ്ടാകും. എന്നാൽ തീരെ കുറയ്ക്കാത്ത ആളുമല്ല ഞാൻ. അത്യാവശ്യം ചെയ്യും. അതിനപ്പുറവും കുറയ്ക്കണമെന്ന് വാശി പിടിച്ചാൽ ഞാൻ കണിശക്കാരിയാകും.”
എന്നാൽ, ഒരു പരിപാടി പൂർത്തിയാകുമ്പോൾ സംഘാടകരും സന്തോഷത്തോടെയിരിക്കണമെന്നാണ് തന്റെ ആഗ്രഹമെന്നും റിമി വ്യക്തമാക്കിയിട്ടുണ്ട്.
സ്വന്തം അധ്വാനത്തിന്റെ മൂല്യം തിരിച്ചറിഞ്ഞ് ജീവിതത്തിൽ മുന്നേറിയ റിമി ടോമിയുടെ യാത്ര നിരവധി പേർക്ക് പ്രചോദനമാണ്. ജീവിതത്തിലെ പുതിയ അധ്യായത്തിലേക്ക് കടക്കാനൊരുങ്ങുന്ന താരത്തിന് സോഷ്യൽ മീഡിയയിലൂടെ ആശംസകളുമായി ആരാധകരും രംഗത്തെത്തുന്നുണ്ട്.