കണക്ടിങ് ദി അൺകണക്ടഡ്; അവസരങ്ങളുടെ ഡിജിറ്റൽ ലോകത്തേക്ക് കേരളത്തെ കൈപിടിച്ചുയർത്തി കെഫോൺ*

മികച്ച വിദ്യാഭ്യാസം, തൊഴിൽ, ആരോഗ്യപരിരക്ഷ, സർക്കാർ സേവനങ്ങൾ എന്നിവ തേടി നഗരങ്ങളിലേക്ക് പോകുന്നത് പതിറ്റാണ്ടുകളായി സ്വാഭാവികമായ ഒരു പ്രവണതയാണ്. പ്രത്യേകിച്ച് വിദൂര പ്രദേശങ്ങളിൽ താമസിക്കുന്നവർക്ക് അവസരങ്ങളുടെ ലോകം പലപ്പോഴും കിലോമീറ്ററുകൾക്ക് അകലെയായിരുന്നു. എന്നാൽ ഡിജിറ്റൽ സേവനങ്ങൾ ജീവിതത്തിന്റെ അവിഭാജ്യ ഘടകമായി മാറിയിരിക്കുന്ന ഇന്നത്തെ സാഹചര്യത്തിൽ, വിശ്വസനീയമായ ഒരു ഇന്റർനെറ്റ് കണക്ഷന് ഈ യാഥാർഥ്യത്തെ മാറ്റിമറിക്കാനുള്ള ശേഷിയുണ്ട്.

സാമൂഹിക വികസനത്തിന്റെ കേരള മാതൃകയ്ക്ക് ഇന്ന് പുതിയൊരു ഡിജിറ്റൽ മുഖം കൈവന്നിരിക്കുകയാണ്. വിദ്യാഭ്യാസം, ആരോഗ്യം, പൊതുസേവനങ്ങൾ, സംരംഭകത്വം തുടങ്ങി ജീവിതത്തിന്റെ വിവിധ മേഖലകളെ ഡിജിറ്റൽ ലോകവുമായി ബന്ധിപ്പിച്ചുകൊണ്ട്, സാങ്കേതികവിദ്യയുടെ നേട്ടങ്ങൾ സമൂഹത്തിന്റെ എല്ലാ വിഭാഗങ്ങളിലേക്കും എത്തിക്കുന്നതിൽ നിർണായക പങ്കുവഹിക്കുകയാണ് കേരള ഫൈബർ ഒപ്റ്റിക് നെറ്റ്‌വർക്ക് (കെഫോൺ). ‘കണക്ടിങ് ദി അൺകണക്ടഡ്’ എന്ന ആശയം യാഥാർഥ്യമാക്കിക്കൊണ്ട്, ഡിജിറ്റൽ ലോകത്തിന്റെ സാധ്യതകൾ എല്ലാവരിലേക്കും എത്തിക്കാനുള്ള ശ്രമമാണ് കെഫോൺ നടത്തുന്നത്.

ഇന്ന് ഒരു ഇന്റർനെറ്റ് കണക്ഷൻ എന്നത് വെറും കണക്റ്റിവിറ്റിയല്ല. ഒരു വിദ്യാർത്ഥിക്ക് ഓൺലൈൻ പഠന വിഭവങ്ങളിലേക്കുള്ള പ്രവേശനവും, ഒരു യുവാവിന് പുതിയ തൊഴിൽ സാധ്യതകളും, ഒരു കുടുംബത്തിന് സർക്കാർ സേവനങ്ങളിലേക്കുള്ള എളുപ്പത്തിലുള്ള ആക്സസും, ഒരു സംരംഭകന് ഡിജിറ്റൽ സമ്പദ്‌വ്യവസ്ഥയുടെ ഭാഗമാകാനുള്ള അവസരവുമാണ് അത്. സ്വന്തം നാട്ടിൽ തന്നെയിരുന്ന് പഠിക്കാനും, ജോലി ചെയ്യാനും, സംരംഭങ്ങൾ ആരംഭിക്കാനുമുള്ള സാധ്യതകൾ വർധിക്കുമ്പോൾ, പ്രാദേശിക വികസനത്തിനും അത് വലിയ കരുത്തായി മാറുന്നു.

‘കണക്ടിങ് ദി അൺകണക്ടഡ്’ എന്നത് ഇന്റർനെറ്റ് ലഭ്യമല്ലാത്തവരിലേക്ക് കണക്ഷൻ എത്തിക്കുക എന്നതിലുപരി, അവസരങ്ങൾ ലഭ്യമല്ലാത്തവരിലേക്ക് സാധ്യതകളുടെ ലോകം തുറന്നുകൊടുക്കുക എന്ന ആശയമാണ്. ഒരു വിദ്യാർത്ഥിക്ക് പഠനത്തിനുള്ള പുതിയ വാതിലുകൾ തുറക്കുന്നതും, ഒരു കുടുംബത്തിന് സർക്കാർ സേവനങ്ങൾ കൂടുതൽ എളുപ്പത്തിൽ പ്രാപ്യമാക്കുന്നതും, ഒരു സംരംഭകന് ഡിജിറ്റൽ സമ്പദ്‌വ്യവസ്ഥയുടെ ഭാഗമാകാൻ അവസരമൊരുക്കുന്നതും, വിദൂര പ്രദേശങ്ങളെ വികസനത്തിന്റെ മുഖ്യധാരയുമായി ബന്ധിപ്പിക്കുന്നതുമെല്ലാം ഈ ആശയത്തിന്റെ ഭാഗമാണ്.

ഈ ദൗത്യത്തിന് കേരളം നൽകുന്ന സ്വീകാര്യതയുടെ നേർക്കാഴ്ചയാണ് കെഫോണിന്റെ വളർച്ച. സംസ്ഥാനത്തുടനീളം 1,88,824 സജീവ കണക്ഷനുകളുമായി രണ്ട് ലക്ഷം കണക്ഷനുകൾ എന്ന നാഴികക്കല്ലിലേക്ക് അതിവേഗം മുന്നേറുകയാണ് കെഫോൺ. നഗരങ്ങളിലും ഗ്രാമങ്ങളിലും ഒരുപോലെ മികച്ച സ്വീകാര്യതയാണ് പദ്ധതിക്ക് ലഭിക്കുന്നത്. സംസ്ഥാനത്തിന്റെ പകുതിയിലധികം ജില്ലകളിൽ പതിനയ്യായിരത്തിലധികം കണക്ഷനുകൾ നൽകാൻ കെഫോണിന് ഇതിനോടകം സാധിച്ചിട്ടുണ്ട്.
സേവന വ്യാപ്തിയിലും സാമൂഹിക പ്രതിബദ്ധതയിലും ഒരുപോലെ മുന്നേറുന്ന കെഫോൺ, ദാരിദ്ര്യരേഖയ്ക്ക് താഴെയുള്ള 14,231 കുടുംബങ്ങൾക്ക് സൗജന്യ ഇന്റർനെറ്റ് കണക്ഷൻ ലഭ്യമാക്കിയിട്ടുണ്ട്. ഡിജിറ്റൽ സേവനങ്ങൾ സമൂഹത്തിലെ എല്ലാ വിഭാഗങ്ങൾക്കും പ്രാപ്യമാക്കുക എന്ന ലക്ഷ്യത്തോടെ നടപ്പാക്കുന്ന ഈ ഇടപെടൽ, സാമ്പത്തികമായി പിന്നാക്കം നിൽക്കുന്ന കുടുംബങ്ങൾക്ക് വിദ്യാഭ്യാസം, വിവരലഭ്യത, സർക്കാർ സേവനങ്ങൾ എന്നിവയിലേക്കുള്ള പ്രവേശനം കൂടുതൽ എളുപ്പമാക്കുന്നു. ഡിജിറ്റൽ ലോകത്തിൽ ആരും പിന്നിലാകരുതെന്ന കാഴ്ചപ്പാടിന്റെ ഭാഗമായാണ് ഈ സാമൂഹിക ഇടപെടലുകൾ.

‘കണക്ടിങ് ദി അൺകണക്ടഡ്’ എന്ന ആശയത്തെ ഏറ്റവും അർഥവത്താക്കുന്നത് സംസ്ഥാനത്തെ വിദൂര പ്രദേശങ്ങളിലേക്കുള്ള കെഫോണിന്റെ ഡിജിറ്റൽ യാത്രയാണ്. ഇന്റർനെറ്റ് കണക്റ്റിവിറ്റി ഒരു സ്വപ്നമായി മാത്രം നിലനിന്നിരുന്ന ആദിവാസി മേഖലകളിലേക്കും ഭൗമശാസ്ത്രപരമായ വെല്ലുവിളികൾ നേരിടുന്ന പ്രദേശങ്ങളിലേക്കും അതിവേഗ ഇന്റർനെറ്റ് എത്തിക്കാൻ കെഫോണിന് കഴിഞ്ഞിട്ടുണ്ട്. തിരുവനന്തപുരം ജില്ലയിലെ കോട്ടൂർ പഞ്ചായത്തിലെ ചോനംപാറ, വാലിപ്പാറ എന്നീ ആദിവാസി ഊരുകൾ, പാലക്കാട് ജില്ലയിലെ അട്ടപ്പാടിയിലെ വിദൂര ഗ്രാമങ്ങൾ, വയനാട് ജില്ലയിലെ ഉൾനാടൻ പ്രദേശങ്ങൾ എന്നിവ ഇന്ന് കെഫോണിന്റെ ഡിജിറ്റൽ ശൃംഖലയുടെ ഭാഗമാണ്.

ഭൗതികമായി അകലെയായിരുന്നാലും ഡിജിറ്റൽ ലോകത്ത് ആരും ഒറ്റപ്പെടരുതെന്ന കാഴ്ചപ്പാടോടെയാണ് കെഫോൺ ഈ മേഖലകളെ കേരളത്തിന്റെ ഡിജിറ്റൽ ഭൂപടത്തിലേക്ക് കൂട്ടിച്ചേർത്തത്. മികച്ച വിദ്യാഭ്യാസം, തൊഴിൽ, സർക്കാർ സേവനങ്ങൾ എന്നിവ തേടി സ്വന്തം നാട് വിട്ടുപോകേണ്ട സാഹചര്യം കുറയ്ക്കുകയും, അവസരങ്ങൾ തന്നെ ജനങ്ങളിലേക്കെത്തിക്കുകയും ചെയ്യുന്ന പുതിയ വികസന മാതൃകയ്ക്ക് കെഫോൺ വഴിയൊരുക്കുകയാണ്.

സംസ്ഥാനത്തിന്റെ വിവിധ ഭാഗങ്ങളിലായി കെഫോണിന്റെ സേവനവ്യാപനം ശ്രദ്ധേയമായ വളർച്ചയാണ് രേഖപ്പെടുത്തുന്നത്. ഈ വളർച്ചയുടെ ഏറ്റവും ശ്രദ്ധേയമായ ഉദാഹരണമാണ് മലപ്പുറം ജില്ല. 37,246 സജീവ കണക്ഷനുകളുമായി സംസ്ഥാനത്ത് ഏറ്റവും കൂടുതൽ കെഫോൺ കണക്ഷനുകളുള്ള ജില്ലയായി മലപ്പുറം മാറിയിരിക്കുകയാണ്. മലബാർ മേഖലയിലെ ഡിജിറ്റൽ മുന്നേറ്റത്തിന് പുതിയ ഊർജ്ജം പകരുന്ന ഈ നേട്ടം, പദ്ധതിക്ക് ലഭിച്ചുവരുന്ന ജനപിന്തുണയുടെയും സ്വീകാര്യതയുടെയും തെളിവുകൂടിയാണ്.
സംസ്ഥാനത്തെ മറ്റു ജില്ലകളിലും കെഫോണിന്റെ സേവനവ്യാപനം അതിവേഗത്തിലാണ് പുരോഗമിക്കുന്നത്. പാലക്കാട് (17,130), കോട്ടയം (16,758), കോഴിക്കോട് (16,065), എറണാകുളം (14,889), കൊല്ലം (14,199), തൃശൂർ (13,171), തിരുവനന്തപുരം (12,105) എന്നീ ജില്ലകളിൽ ശ്രദ്ധേയമായ വളർച്ചയാണ് രേഖപ്പെടുത്തുന്നത്. വയനാട് (9491), ഇടുക്കി (9691), കണ്ണൂർ (8246), ആലപ്പുഴ (8379), കാസർഗോഡ് (5,188), പത്തനംതിട്ട (5,169) എന്നീ ജില്ലകളിലും കെഫോൺ സേവനങ്ങൾ വ്യാപിച്ചുകൊണ്ടിരിക്കുകയാണ്.
32,000 കിലോമീറ്ററിലധികം ദൈർഘ്യമുള്ള ഒപ്റ്റിക്കൽ ഫൈബർ ശൃംഖലയുടെ പിന്തുണയോടെ കേരളത്തിന്റെ എല്ലാ ഭാഗങ്ങളിലേക്കും വിശ്വാസ്യതയുള്ള അതിവേഗ ഇന്റർനെറ്റ് എത്തിക്കാനുള്ള ശ്രമങ്ങളാണ് കെഫോൺ ശക്തമാക്കുന്നത്. നഗരങ്ങളും ഗ്രാമങ്ങളും തമ്മിലുള്ള ഡിജിറ്റൽ അന്തരം കുറച്ചുകൊണ്ട് കൂടുതൽ കുടുംബങ്ങളിലേക്കും സ്ഥാപനങ്ങളിലേക്കും സേവനം വ്യാപിപ്പിക്കുന്നതോടൊപ്പം, 2026 അവസാനത്തോടെ 2.5 ലക്ഷം കണക്ഷനുകൾ എന്ന ലക്ഷ്യത്തിലേക്കും കെഫോൺ ആത്മവിശ്വാസത്തോടെ മുന്നേറുകയാണ്.

സാധാരണ കുടുംബങ്ങളുടെ ബജറ്റിന് അനുയോജ്യമായ നിരക്കിൽ അതിവേഗ ഇന്റർനെറ്റ് സേവനങ്ങൾ ലഭ്യമാക്കുന്നതിനാണ് കെഫോൺ മുൻഗണന നൽകുന്നത്. ഇന്ന് ഇന്റർനെറ്റ് വിദ്യാഭ്യാസത്തിനും തൊഴിൽ ആവശ്യങ്ങൾക്കും മാത്രമല്ല, കുടുംബങ്ങളുടെ ദൈനംദിന ജീവിതത്തിന്റെ അവിഭാജ്യ ഘടകമായി മാറിയിരിക്കുകയാണ്. ബാങ്കിങ് സേവനങ്ങൾ, ഓൺലൈൻ പേയ്‌മെന്റുകൾ, വിനോദം, വീഡിയോ കോളുകൾ, സർക്കാർ സേവനങ്ങൾ തുടങ്ങി നിരവധി ആവശ്യങ്ങൾക്കായി എല്ലാ പ്രായക്കാരും ഇന്റർനെറ്റിനെ ആശ്രയിക്കുന്ന സാഹചര്യത്തിൽ, മിതമായ നിരക്കിൽ ഗുണമേന്മയുള്ള സേവനങ്ങൾ ലഭ്യമാക്കുക എന്നത് ഏറെ പ്രധാനപ്പെട്ടതാണ്.

രാജ്യത്തെ ആദ്യത്തെ സർക്കാർ ഉടമസ്ഥതയിലുള്ള ബ്രോഡ്ബാൻഡ് സേവനമായ കെഫോൺ, 99.9 ശതമാനം സർവീസ് ലഭ്യത ഉറപ്പുനൽകുന്നു. വിവിധ ഉപഭോക്തൃ ആവശ്യങ്ങൾ പരിഗണിച്ച് രൂപകൽപ്പന ചെയ്ത ബ്രോഡ്ബാൻഡ് പ്ലാനുകളാണ് കെഫോൺ അവതരിപ്പിച്ചിരിക്കുന്നത്. ₹299 മുതൽ ആരംഭിക്കുന്ന പ്ലാനിൽ 20 Mbps വേഗതയിൽ 1000 GB ഡാറ്റയും, ₹349 പ്ലാനിൽ 30 Mbps വേഗതയിൽ 3000 GB ഡാറ്റയും ലഭ്യമാണ്. ഇതിന് പുറമെ ₹399, ₹449, ₹499, ₹599, ₹799, ₹999, ₹1499 എന്നീ നിരക്കുകളിലുള്ള വിവിധ പ്ലാനുകളും ഉപഭോക്താക്കൾക്കായി ലഭ്യമാണ്. വീടുകൾ, ചെറുകിട സ്ഥാപനങ്ങൾ, ഓഫീസുകൾ എന്നിവയുടെ വ്യത്യസ്ത ഉപയോഗ ആവശ്യങ്ങൾ കണക്കിലെടുത്താണ് ഈ പ്ലാനുകൾ തയ്യാറാക്കിയിരിക്കുന്നത്.

ഇന്റർനെറ്റ് സേവനങ്ങൾക്കപ്പുറം ഡിജിറ്റൽ വിനോദരംഗത്തും കെഫോൺ ശ്രദ്ധേയമായ മുന്നേറ്റമാണ് കൈവരിച്ചിരിക്കുന്നത്. 29 ഒ.ടി.ടി ആപ്ലിക്കേഷനുകളും 350-ലധികം ഡിജിറ്റൽ ടി.വി ചാനലുകളും ഉൾക്കൊള്ളുന്ന കെഫോൺ ഒ.ടി.ടി പ്ലാറ്റ്ഫോം ഇതിനോടകം 4,000-ത്തിലധികം സബ്സ്ക്രൈബർമാരെ സ്വന്തമാക്കിയിട്ടുണ്ട്. ആമസോൺ പ്രൈം ലൈറ്റ്, ജിയോ ഹോട്ട്സ്റ്റാർ, സോണി ലിവ്, സീ5, ഫാൻകോഡ്, ഡിസ്കവറി പ്ലസ് തുടങ്ങിയ പ്രമുഖ ഒ.ടി.ടി സേവനങ്ങൾ ഒരൊറ്റ പ്ലാറ്റ്ഫോമിലൂടെ ലഭ്യമാക്കുന്ന അഞ്ച് വ്യത്യസ്ത പാക്കേജുകളാണ് കെഫോൺ അവതരിപ്പിച്ചിരിക്കുന്നത്. ഈ പാക്കേജുകൾ ഒരുമാസം, മൂന്ന് മാസം, ആറുമാസം, ഒരു വർഷം എന്നിങ്ങനെ വ്യത്യസ്ത കാലയളവുകളിൽ ലഭ്യമാക്കിയിട്ടുണ്ട്.

ഒരേ സമയം ഇന്റർനെറ്റ് സേവനവും വൈവിധ്യമാർന്ന ഡിജിറ്റൽ വിനോദ സേവനങ്ങളും കുടുംബ ബജറ്റിന് അനുയോജ്യമായ നിരക്കിൽ ലഭ്യമാക്കുന്നതിലൂടെ ഉപഭോക്താക്കൾക്ക് കൂടുതൽ മൂല്യം നൽകുന്ന സേവന മാതൃകയാണ് കെഫോൺ മുന്നോട്ടുവയ്ക്കുന്നത്. ഡിജിറ്റൽ സേവനങ്ങൾ കൂടുതൽ ആളുകൾക്ക് സാമ്പത്തികമായി താങ്ങാനാകുന്ന തരത്തിൽ ലഭ്യമാക്കുകയെന്ന ലക്ഷ്യത്തോടെയാണ് കെഫോൺ സേവനങ്ങൾ വിപുലീകരിച്ചുകൊണ്ടിരിക്കുന്നത്.

വിദ്യാഭ്യാസം, ആരോഗ്യം, തൊഴിൽ, സർക്കാർ സേവനങ്ങൾ തുടങ്ങി സമൂഹത്തിന്റെ വിവിധ മേഖലകളിൽ പുതിയ സാധ്യതകൾ തുറന്നുകൊടുക്കുകയാണ് കെഫോൺ. അതിവേഗ ഇന്റർനെറ്റ് സേവനം ഇന്ന് ഒരു സൗകര്യം മാത്രമല്ല, വികസനത്തിന്റെ അടിസ്ഥാന ആവശ്യങ്ങളിലൊന്നായി മാറിക്കൊണ്ടിരിക്കുകയാണ്. അതുകൊണ്ടുതന്നെ, കേരളത്തിന്റെ ഡിജിറ്റൽ ഭാവിയെ നിർണയിക്കാൻ ശേഷിയുള്ള ഇത്തരം വലിയ പൊതുമേഖലാ പദ്ധതികൾ പൊതുചർച്ചകൾക്കും വിലയിരുത്തലുകൾക്കും വിധേയമാകുന്നത് സ്വാഭാവികമാണ്.

സമീപകാലത്ത് സ്കൂളുകളിലെ ഇന്റർനെറ്റ് സേവനങ്ങൾ, സേവനച്ചെലവുകൾ, പദ്ധതിയുടെ കാര്യക്ഷമത, ഭരണപരമായ തീരുമാനങ്ങൾ തുടങ്ങിയ വിഷയങ്ങൾ പൊതുചർച്ചകൾക്ക് വഴിവെച്ചിട്ടുണ്ട്. പൊതുപണം വിനിയോഗിക്കുന്ന ഏതൊരു പദ്ധതിയും ജനങ്ങളുടെ ചോദ്യങ്ങൾക്കും വിമർശനങ്ങൾക്കും മറുപടി പറയേണ്ട ഉത്തരവാദിത്തം വഹിക്കുന്നുണ്ട്. എന്നാൽ ഇത്തരം ചർച്ചകൾ സേവനച്ചെലവുകളിലോ കണക്ഷനുകളുടെ എണ്ണത്തിലോ മാത്രം ഒതുങ്ങേണ്ടതില്ല. മറിച്ച്, കേരളം പോലുള്ള ഒരു സംസ്ഥാനം സ്വന്തം ഡിജിറ്റൽ അടിസ്ഥാനസൗകര്യത്തിൽ നിക്ഷേപം നടത്തേണ്ടതുണ്ടോ എന്ന വലിയ ചോദ്യത്തിലേക്കും അവ നമ്മെ നയിക്കേണ്ടതുണ്ട്.

ഒരുകാലത്ത് റോഡുകളും പാലങ്ങളും വൈദ്യുതിയും ഒരു സംസ്ഥാനത്തിന്റെ വികസനത്തിന്റെ പ്രധാന സൂചകങ്ങളായിരുന്നുവെങ്കിൽ, ഇന്ന് അതിവേഗ ഇന്റർനെറ്റ് സേവനങ്ങളും അതേ പ്രാധാന്യത്തോടെയാണ് വിലയിരുത്തപ്പെടുന്നത്. അവയുടെ യഥാർഥ മൂല്യം കണക്ഷനുകളുടെ എണ്ണത്തിലോ സേവനച്ചെലവുകളിലോ മാത്രമല്ല പ്രതിഫലിക്കുന്നത്. മറിച്ച്, സമൂഹത്തിന്റെ വിവിധ വിഭാഗങ്ങൾക്ക് അവ സൃഷ്ടിക്കുന്ന പുതിയ അവസരങ്ങളിലും ഭാവി തലമുറകൾക്ക് ഒരുക്കിക്കൊടുക്കുന്ന വികസന സാധ്യതകളിലുമാണ് അതിന്റെ യഥാർഥ പ്രസക്തി അടങ്ങിയിരിക്കുന്നത്.

ഇന്ന് അതിവേഗ ഇന്റർനെറ്റ് ഒരു സാങ്കേതിക സേവനം മാത്രമല്ല; അത് വിദ്യാഭ്യാസത്തിലേക്കുള്ള ഒരു വാതിലും തൊഴിൽ സാധ്യതകളിലേക്കുള്ള ഒരു പാലവും സാമൂഹിക പുരോഗതിയിലേക്കുള്ള ഒരു ചുവടുവയ്പ്പുമാണ്. കേരളത്തിന്റെ ഓരോ കോണിലേക്കും ഡിജിറ്റൽ അവസരങ്ങൾ എത്തിക്കുന്നതിലൂടെ, വികസനത്തിന്റെ പുതിയ സാധ്യതകളാണ് കെഫോൺ തുറന്നുകൊടുക്കുന്നത്. ഡിജിറ്റൽ ലോകത്ത് ആരും പിന്നിലാകരുതെന്ന വലിയ ലക്ഷ്യത്തിലേക്കുള്ള കേരളത്തിന്റെ കൂട്ടായ യാത്രയുടെ ഭാഗമായാണ് കെഫോൺ ഇന്ന് മാറിക്കൊണ്ടിരിക്കുന്നത്.

ഉപഭോക്താക്കൾക്ക് സമയബന്ധിതവും കാര്യക്ഷമവുമായ സേവനങ്ങൾ ഉറപ്പാക്കുന്നതിനും കെഫോൺ പ്രത്യേക പ്രാധാന്യം നൽകുന്നുണ്ട്. ഉപഭോക്താക്കളുടെ പരാതികൾ അതിവേഗം പരിഹരിക്കുന്നതിനായി L1, L2, L3 എന്നിങ്ങനെ മൂന്ന് തലങ്ങളിലായി പ്രവർത്തിക്കുന്ന കോൾ സെന്റർ സംവിധാനമാണ് കെഫോണിനുള്ളത്. സാങ്കേതിക വൈദഗ്ധ്യമുള്ള 37 അംഗ സംഘമാണ് ഈ സേവനങ്ങൾ ഏകോപിപ്പിക്കുന്നത്. ഇതിൽ 60 ശതമാനവും സ്ത്രീകളാണെന്നത് സാങ്കേതിക മേഖലയിലെ വനിതാ ശാക്തീകരണത്തിനും തൊഴിൽ അവസരങ്ങൾ സൃഷ്ടിക്കുന്നതിനും കെഫോൺ നൽകുന്ന പ്രാധാന്യം വ്യക്തമാക്കുന്നു.

ഉപഭോക്തൃ സേവനങ്ങൾ കൂടുതൽ സുതാര്യവും സൗകര്യപ്രദവുമാക്കുന്നതിനായി ആധുനിക ടിക്കറ്റിംഗ് സോഫ്റ്റ്‌വെയറിന്റെ സഹായത്തോടെ പരാതി രജിസ്റ്റർ ചെയ്യുന്ന ഘട്ടം മുതൽ പരിഹാരം ലഭിക്കുന്നതുവരെ ഉപഭോക്താക്കൾക്ക് തത്സമയം എസ്.എം.എസ് അറിയിപ്പുകൾ ലഭ്യമാക്കുന്ന സംവിധാനവും കെഫോൺ നടപ്പാക്കിയിട്ടുണ്ട്. മലയാളത്തിലും ഇംഗ്ലീഷിലും ലഭ്യമാകുന്ന ഈ സേവനങ്ങൾ, ഉപഭോക്തൃ കേന്ദ്രീകൃതമായ സേവന മാതൃകയ്ക്ക് കെഫോൺ നൽകുന്ന പ്രാധാന്യത്തിന്റെ മികച്ച ഉദാഹരണമാണ്.
ഡിജിറ്റൽ സേവനങ്ങളുടെ ഉപയോഗം ദിനംപ്രതി വർധിച്ചുവരുന്ന സാഹചര്യത്തിൽ, സംസ്ഥാനത്തിന്റെ കൂടുതൽ മേഖലകളിലേക്ക് കെഫോണിന്റെ സേവനങ്ങൾ വ്യാപിപ്പിക്കുന്നതിനും പുതിയ സാങ്കേതിക സേവനങ്ങൾ ഉൾപ്പെടുത്തുന്നതിനും വിവിധ പദ്ധതികൾ ആവിഷ്കരിച്ചുവരികയാണെന്ന് അധികൃതർ വ്യക്തമാക്കി. വീടുകൾ, വിദ്യാഭ്യാസ സ്ഥാപനങ്ങൾ, സർക്കാർ ഓഫീസുകൾ, പൊതുസേവന മേഖലകൾ എന്നിവയ്ക്ക് കൂടുതൽ കരുത്തേകുന്ന തരത്തിൽ സേവനങ്ങളുടെ വ്യാപ്തിയും ഗുണമേന്മയും വർധിപ്പിക്കാനുള്ള നടപടികളാണ് പുരോഗമിക്കുന്നത്. കേരളത്തിന്റെ ഡിജിറ്റൽ അടിസ്ഥാനസൗകര്യം കൂടുതൽ ശക്തിപ്പെടുത്തുകയെന്ന ലക്ഷ്യത്തോടെയാണ് വരും വർഷങ്ങളിലെ വികസന പദ്ധതികൾക്ക് രൂപം നൽകുന്നതെന്നും അധികൃതർ അറിയിച്ചു.
കെഫോണിന്റെ പുതിയ ഗാര്‍ഹിക കണക്ഷന്‍ എടുക്കുന്നതിനായി എന്റെ കെഫോണ്‍ എന്ന മൊബൈല്‍ ആപ്പിലൂടെയോ കെഫോണ്‍ വെബ്‌സൈറ്റിലൂടെയോ രജിസ്റ്റര്‍ ചെയ്യാം. 18005704466 എന്ന ടോള്‍ഫ്രീ നമ്പര്‍ വഴിയും കണക്ഷന്‍ ലഭിക്കുന്നതിനായി രജിസ്റ്റര്‍ ചെയ്യാവുന്നതാണ്. കെഫോണ്‍ പ്ലാനുകളെയും ഓഫറുകളേയും കുറിച്ച് കൂടുതല്‍ അറിയുവാന്‍ കെഫോണ്‍ ഔദ്യോഗിക വെബ്സൈറ്റായ https://kfon.in/ല്‍ സന്ദര്‍ശിക്കുകയോ 90616 04466 എന്ന വാട്സ്ആപ്പ് നമ്പരില്‍ KFON Plans എന്ന് ടൈപ്പ് ചെയ്ത് മെസേജ് ചെയ്‌തോ കെഫോണ്‍ പ്ലാനുകള്‍ അറിയാനാവും.
***