പോരാട്ടവീഥിയിലെ ഒരു സൗഹൃദക്കാഴ്ച

ഷൊർണൂരിലെ എൽ ഡി എഫ് സ്ഥാനാർത്ഥി പി മമ്മിക്കുട്ടിയും യു ഡി എഫ് സ്ഥാനാർത്ഥി പി ഹരിഗോവിന്ദനും നേർക്കുനേർ കണ്ടുമുട്ടിയപ്പോൾ സ്നേഹത്തിന്റെയും സൗഹൃദത്തിന്റെയും നേർക്കാഴ്ച സമ്മാനിച്ചു കൊണ്ടാണ്  ആലിംഗനത്തിൽ അവർ ഒന്നിച്ചു ചേർന്നത്. കണ്ടുനിൽക്കുന്നവരിൽ ആനന്ദവും അതിലേറെ ആകാംക്ഷയും നിറഞ്ഞതായിരുന്നു ഈ രണ്ടു സ്ഥാനാർത്ഥികളുടെ കൂടിക്കാഴ്ച. ചെർപ്പുളശ്ശേരിയിലെ വൺ ന്യൂസ് ചാനൽ ആണ്   ” MEET THE CANDIDATES” എന്ന പരിപാടിയിൽ ഇരുവരെയും അണിനിരത്തിയത്.

രാഷ്ട്രീയത്തിൽ ആശയപരമായി വിയോജിപ്പുകൾ ഉണ്ടെങ്കിലും വ്യക്തിപരമായി എല്ലാവരും നല്ല സൗഹൃദത്തിലാണ്. മുഖ്യമന്ത്രിയും പ്രതിപക്ഷ നേതാവും പലപ്പോഴും ഒരേ വേദിയിൽ ഭക്ഷണം കഴിച്ചും ഒരുമിച്ച് ഫോട്ടോ എടുത്തും സ്നേഹം പങ്കുവെച്ചും കാണുമ്പോൾ പരസ്പരം പോരടിക്കുന്ന രാഷ്ട്രീയ അടിമകൾ ഒന്നും മനസ്സിലാവാതെ വീണ്ടും അവരുടെ നിലവാരം കുറഞ്ഞ രാഷ്ട്രീയം പുറത്തെടുക്കുന്നു.. എന്നാൽ നേതാക്കൾ ആകട്ടെ വേദികൾ പങ്കിട്ടും ഓണമുണ്ടും, ഇഫ്താർ നടത്തിയും ഒരുമിച്ച് ചേരുന്നു. എല്ലാ സ്ഥലത്തും ഇങ്ങനെയൊക്കെയാണ്. എന്നാൽ കൊടിയുടെ പേരിൽ കലഹം ഉണ്ടാക്കുന്ന താഴെ തട്ടിലുള്ള രാഷ്ട്രീയം പോലും അറിയാത്ത പാവപ്പെട്ട ജനങ്ങൾ തമ്മിൽ കലഹിച്ചും തന്റെ സ്ഥാനാർത്ഥി ജയിക്കണം എന്ന പേരിൽ അക്രമം അഴിച്ചുവിട്ടു നാട്ടിൽ അരക്ഷിതാവസ്ഥ സൃഷ്ടിക്കുമ്പോൾ നിങ്ങൾ ഒരു കാര്യം ഓർക്കുക ഈ മുകളിലെ ഫോട്ടോ നോക്കി നിങ്ങളുടെ നേതാക്കൾ രാഷ്ട്രീയ വൈരം മറന്ന് പരസ്പരം കെട്ടിപ്പിടിച്ചും സ്നേഹിച്ചും ആണ് കഴിയുന്നത് എന്ന് ഒരു നിമിഷമെങ്കിലും ഓർത്താൽ നന്ന്.