ഗുരുവായൂർ ക്ഷേത്രത്തിലെ ഭണ്ഡാരമെണ്ണലിന് ഇന്ന് ഒരു ചരിത്ര നാഴികക്കല്ല്.

ഗുരുവായൂർ.  ഓരോ മാസവും ഭണ്ഡാരം തുറന്ന് എണ്ണുന്ന നിലവിലെ രീതിക്ക് 50 വർഷം തികയുകയാണ്. 1976 ജൂണിലായിരുന്നു ആദ്യമായി പ്രതിമാസ ഭണ്ഡാരമെണ്ണൽ ആരംഭിച്ചത്. അന്ന് ഭക്തർ സമർപ്പിച്ച തുക വെറും 3.86 ലക്ഷം രൂപയായിരുന്നു. എന്നാൽ അഞ്ച് പതിറ്റാണ്ടുകൾ പിന്നിടുമ്പോൾ ആ സംഖ്യ 8.50 കോടി രൂപയിലേക്ക് ഉയർന്നിരിക്കുകയാണ്.
ആദ്യകാല ഭണ്ഡാരമെണ്ണലുകൾ ഇന്നും ജീവനക്കാർക്ക് മറക്കാനാവാത്ത ഓർമ്മകളാണ്. രണ്ട് പൈസ, മൂന്ന് പൈസ, അഞ്ച് പൈസ, പത്ത് പൈസ, 25 പൈസ നാണയങ്ങളായിരുന്നു ഭണ്ഡാരങ്ങളിൽ കൂടുതലായും ലഭിച്ചിരുന്നത്. ഒരു രൂപ പോലും വലിയ സമർപ്പണമായി കണക്കാക്കിയിരുന്ന കാലം. ഇന്ന് ആയിരങ്ങളും ലക്ഷങ്ങളും ഭക്തർ ഭണ്ഡാരത്തിൽ നിക്ഷേപിക്കുന്നുണ്ടെങ്കിലും ആ ചെറിയ നാണയത്തുട്ടുകളിൽ നിറഞ്ഞിരുന്ന വിശ്വാസത്തിന്റെ മൂല്യം ഒരിക്കലും കുറഞ്ഞിട്ടില്ല.
കാലം മാറി. നാണയങ്ങൾ മാറി. നോട്ടുകൾ മാറി. 2000 രൂപയും 1000 രൂപയും പഴയ 500 രൂപ നോട്ടുകളും പ്രചാരണം നിർത്തിയെങ്കിലും അവ ഇപ്പോഴും ഭണ്ഡാരങ്ങളിൽ നിന്ന് ലഭിക്കുന്നുണ്ട്.
ഭക്തരുടെ എണ്ണത്തിനൊപ്പം ഭണ്ഡാരങ്ങളുടെ എണ്ണവും വർധിച്ചു. ക്ഷേത്രത്തിനകത്തും പുറത്തുമായി ഇന്ന് 40-ഓളം ഭണ്ഡാരങ്ങളാണ് പ്രവർത്തിക്കുന്നത്. മാസാവസാനം തുറന്നില്ലെങ്കിൽ നോട്ടുകളും നാണയങ്ങളും നിറഞ്ഞ് കവിയുന്ന അവസ്ഥയാണ്. നിലവിൽ പ്രതിമാസം ശരാശരി ആറുകോടി രൂപയോളം ഭണ്ഡാരവരവ് ലഭിക്കുന്നുണ്ട്.
കാലത്തിനൊത്ത് സാങ്കേതിക വിദ്യയും ഗുരുവായൂരപ്പന്റെ സന്നിധിയിലെത്തി. ഇന്ന് ഭക്തർക്ക് സ്കാനർ സംവിധാനത്തിലൂടെയും ഡിജിറ്റൽ മാർഗങ്ങളിലൂടെയും വഴിപാടുകൾ സമർപ്പിക്കാനുള്ള സൗകര്യമുണ്ട്. എന്നാൽ കൈയിൽ കരുതിയ ഒരു രൂപ നാണയം ഭണ്ഡാരത്തിലിടുന്ന ഭക്തന്റെ പ്രാർത്ഥനയും, മൊബൈൽ ഫോണിലൂടെ അയക്കുന്ന സംഭാവനയും ഒരേ ഭക്തിയുടെ ഭാഷയാണ് സംസാരിക്കുന്നത്.
അമ്പത് വർഷത്തിനിടെ ഭണ്ഡാരവരവിൽ ഉണ്ടായ വർധന വെറും സാമ്പത്തിക വളർച്ചയുടെ കഥയല്ല; ലോകത്തിന്റെ വിവിധ ഭാഗങ്ങളിൽ നിന്ന് ഗുരുവായൂരപ്പനിലേക്ക് ഒഴുകിയെത്തുന്ന കോടിക്കണക്കിന് ഭക്തരുടെ വിശ്വാസത്തിന്റെയും സമർപ്പണത്തിന്റെയും ചരിത്രമാണ്.