കടുവകളുടെ സംരക്ഷണത്തെക്കുറിച്ചും അവ നേരിടുന്ന ഭീഷണികളെക്കുറിച്ചും ആഗോളതലത്തിൽ അവബോധം വളർത്തുന്നതിനായി ജൂലൈ 29 അന്താരാഷ്ട്ര കടുവ ദിനമായി (International Tiger Day) ആചരിക്കുന്നു. വനനശീകരണവും വേട്ടയാടലും മൂലം കടുവകളുടെ എണ്ണത്തിലുണ്ടാകുന്ന ദ്രുതഗതിയിലുള്ള കുറവ് തടയുകയും, അവയുടെ സ്വാഭാവിക വാസസ്ഥലങ്ങൾ സംരക്ഷിക്കുകയും ചെയ്യുക എന്നതാണ് ഈ ദിനാചരണത്തിന്റെ പ്രധാന ലക്ഷ്യം.
2010-ൽ റഷ്യയിലെ സെന്റ് പീറ്റേഴ്സ്ബർഗിൽ നടന്ന ടൈഗർ സമ്മിറ്റിലാണ് ജൂലൈ 29 അന്താരാഷ്ട്ര കടുവ ദിനമായി പ്രഖ്യാപിച്ചത്. ‘കടുവകളുടെ എണ്ണം ഇരട്ടിയാക്കുക’ എന്ന ലക്ഷ്യത്തോടെ ലോകത്തിലെ 13 കടുവ സാന്നിധ്യമുള്ള രാജ്യങ്ങൾ ഈ ഉച്ചകോടിയിൽ പങ്കെടുത്തു.
പരിസ്ഥിതിയുടെ സന്തുലിതാവസ്ഥ നിലനിർത്തുന്നതിൽ കടുവകൾ പ്രധാന പങ്കുവഹിക്കുന്നുണ്ട്. വനങ്ങളുടെയും ജൈവവൈവിധ്യത്തിന്റെയും നിലനിൽപ്പിന് കടുവകളുടെ സംരക്ഷണം അത്യന്താപേക്ഷിതമാണെന്ന് പരിസ്ഥിതി പ്രവർത്തകർ ചൂണ്ടിക്കാണിക്കുന്നു. രാജ്യത്തുടനീളം വിവിധ പരിസ്ഥിതി സംഘടനകളുടെയും വനംവകുപ്പിന്റെയും നേതൃത്വത്തിൽ ബോധവത്കരണ പരിപാടികളും സെമിനാറുകളും ദിനാചരണത്തോടനുബന്ധിച്ച് സംഘടിപ്പിച്ചിട്ടുണ്ട്.
