ചെർപ്പുളശ്ശേര* സൗഹൃദത്തിന്റെ ഇന്നിംഗ്സിന് ഒട്ടും മങ്ങലേറ്റിട്ടില്ലെന്ന് തെളിയിച്ച് ചെർപ്പുളശ്ശേരി ഗവ. ഹൈസ്കൂൾ 1977 SSLC ബാച്ച് വിദ്യാർത്ഥികളുടെ നാലാമത് വാർഷിക കൂട്ടായ്മ സംഘടിപ്പിച്ചു. ചെർപ്പുളശ്ശേരി ഗ്രാൻഡ് ഗായത്രി ഹോട്ടലിൽ വെച്ചായിരുന്നു പഴയകാല സഹപാഠികളും അധ്യാപകരും ഒന്നിച്ച സ്നേഹസംഗമം നടന്നത്.
പതിറ്റാണ്ടുകൾക്ക് മുൻപ് സ്കൂൾ മുറ്റത്ത് ഒന്നിച്ച് ചിരിച്ചും പഠിച്ചും നടന്ന ആ പഴയ കൗമാരക്കാലത്തിലേക്ക് തിരിച്ചെത്തിയതിന്റെ സന്തോഷത്തിലായിരുന്നു എല്ലാവരും. ചടങ്ങിൽ വെച്ച് സഹപാഠികൾ തങ്ങളുടെ പ്രിയപ്പെട്ട അധ്യാപകരെ ആദരിക്കുകയും, അവരിൽ നിന്ന് അനുഗ്രഹങ്ങൾ ഏറ്റുവാങ്ങുകയും ചെയ്തു.
വാർദ്ധക്യത്തിന്റെ നാളുകളിലും സൗഹൃദത്തിന്റെ ഊഷ്മളത കാത്തുസൂക്ഷിക്കുന്ന ഇത്തരം കൂട്ടായ്മകൾ മാതൃകാപരമാണെന്ന് ചടങ്ങിൽ പങ്കെടുത്ത അധ്യാപകർ അഭിപ്രായപ്പെട്ടു.
സ്മരണകളും വിശേഷങ്ങളും പങ്കുവെച്ച സൗഹൃദസംഗമത്തിൽ കലാപരിപാടികളും നടന്നു. ചടങ്ങിനൊടുവിൽ വിഭവസമൃദ്ധമായ ഉച്ചഭക്ഷണത്തിന് ശേഷം, അടുത്ത വർഷവും വീണ്ടും കാണാമെന്ന മനോഹരമായ വാഗ്ദാനത്തോടെയാണ് പ്രിയ കൂട്ടുകാർ പിരിഞ്ഞത്.
