തിരുവനന്തപുരം: കേരള ക്രിക്കറ്റ് ലീഗിൽ തൃശൂർ ടൈറ്റൻസിന് ആവേശകരമായ വിജയം സമ്മാനിച്ചത് മുഹമ്മദ് ഇനാന്റെ തകർപ്പൻ വെടിക്കെട്ട്. അവസാന നിമിഷങ്ങളിൽ ഒറ്റയാൾ പോരാളിയായി മാറിയ ഇനാൻ, തുടർച്ചയായ സിക്സറുകളിലൂടെ മത്സരം തൃശൂർ ടൈറ്റൻസിന്റെ അനുകൂലമാക്കുകയായിരുന്നു.
14.5 ഓവറിൽ അഞ്ച് വിക്കറ്റ് നഷ്ടത്തിൽ 119 റൺസ് എന്ന നിലയിൽ പരുങ്ങിയ തൃശൂർ ടൈറ്റൻസിന് നിർണായകമായത് മുഹമ്മദ് ഇനാന്റെ അവിശ്വസനീയ ബാറ്റിങ് പ്രകടനമായിരുന്നു. വെറും 15 പന്തിൽ 41 റൺസ് നേടിയ ഇനാൻ, ഫീൽഡർമാരുടെ കൈയെത്താദൂരത്തിന് മുകളിലൂടെ പന്തുകൾ അതിർത്തി കടത്തുകയായിരുന്നു.
ഒരു വശത്ത് തുടർച്ചയായി വിക്കറ്റുകൾ നഷ്ടപ്പെടുമ്പോഴും മറുവശത്ത് ഉറച്ചുനിന്ന ഇനാൻ പ്രതീക്ഷ കൈവിടാതെ പോരാടി. അവസാന ഓവറിൽ ഒമ്പത് വിക്കറ്റ് നഷ്ടത്തിൽ 164 റൺസ് എന്ന നിലയിലായിരുന്നു ടൈറ്റൻസ്. അവസാന ഓവറിൽ വേണ്ടിയിരുന്നത് 17 റൺസ്.
സിവി വിനോദ് കുമാർ എറിഞ്ഞ അവസാന ഓവറിലെ ആദ്യ പന്ത് ഓഫ് സൈഡിലും വൈഡ് ലൈനിനോടു ചേർന്നും എറിയാനുള്ള തന്ത്രം
വിജയിച്ചെങ്കിലും രണ്ടാം പന്ത് മുതൽ ഇനാനെ പിടിച്ചുകെട്ടാനായില്ല. രണ്ടാം പന്ത് ഓഫ് സൈഡിലേക്ക് എത്തിയതോടെ ഇനാൻ ലോംഗ് ഓഫിന് മുകളിലൂടെ തകർപ്പൻ സിക്സർ പറത്തി.പിന്നാലെ വന്ന രണ്ട് പന്തുകൾ കൂടി തുടർച്ചയായി അതിർത്തി കടത്തി ഇനാൻ തൃശൂർ ടൈറ്റൻസിനെ വിജയതീരത്തെത്തിച്ചു.