തൃശൂർ: ഇസാഫ് സ്വാശ്രയ മൾട്ടി- സ്റ്റേറ്റ് അഗ്രോ കോ ഓപ്പറേറ്റീവ് സൊസൈറ്റിയുടെ പതിനഞ്ചാമത് വാർഷിക പൊതുയോഗം കായിക, യുവജനകാര്യ വകുപ്പ് മന്ത്രി ഒ ജെ ജെനീഷ് ഉദ്‌ഘാടനം ചെയ്തു. ഇസാഫ് കോ ഓപ്പറേറ്റീവ് സൊസൈറ്റിയുടെ സ്ഥാപകനും ചെയർമാൻ എമിരറ്റസുമായ ഡോ. കെ പോൾ തോമസ് മുഖ്യപ്രഭാഷണം നടത്തി. ചെയർപേഴ്സൺ സലീന ജോർജ് അധ്യക്ഷത വഹിച്ച ചടങ്ങിൽ ചീഫ് എക്സിക്യുട്ടീവ് ഓഫീസർ ജോർജ് തോമസ് വാർഷിക റിപ്പോർട്ട് അവതരിപ്പിച്ചു. കംപ്ലയൻസ് ഓഫീസറും സഹകരണ വിവരാവകാശ ഓഫീസറുമായ വി കെ ജയരാജൻ സഹകരണ പ്രതിജ്ഞ നൽകി. ഐക്യരാഷ്ട്രസഭയുടെ നേതൃത്വത്തിൽ അന്താരാഷ്ട്ര വനിതാ കർഷിക വർഷമായി ആചരിക്കുന്നതിന്റെ ഭാഗമായി സംഘടിപ്പിച്ച പൊതുസമ്മേളനത്തിൽ, കേരളത്തിനു പുറമെ മധ്യപ്രദേശ്, മഹാരാഷ്ട്ര, തമിഴ്നാട് സംസ്ഥാനങ്ങളിൽ ഇസാഫ് സ്വാശ്രയ സംഘം ആരംഭിച്ച കിസാൻ സേവാ കേന്ദ്രങ്ങളുടെ ഉദ്‌ഘാടനവും മന്ത്രി നിർവഹിച്ചു. വിവിധ സംസ്ഥാനങ്ങളിലെ വനിതാ കർഷകരെയും കർഷക ഉത്പാദക സംഘങ്ങളെയും കെ രാജൻ എംഎൽഎയും ഇസാഫ് ഫൗണ്ടേഷൻ എക്സിക്യൂട്ടീവ് ഡയറക്ടർ മെറീന പോളും ചേർന്ന് ആദരിച്ചു. സ്‌നേഹവീട് പദ്ധതിയിൽ ഉൾപ്പെടുത്തി നിർമിച്ച രണ്ടു വീടുകളുടെ താക്കോൽ കൈമാറ്റവും ചടങ്ങിൽ സംഘടിപ്പിച്ചു. പൃഥശക്തി കർഷക ഉത്പാദക കമ്പനി, ലൂംസ് ഓഫ് ലഡാക്ക്, കട്നി കർഷക ഉൽപ്പാദക സംഘടനകൾ, തൃശൂർ മത്സ്യ കർഷക ഉത്പാദക കമ്പനി, മഹാരാഷ്ട്രയിലെ ഇൻഡോ വെജിറ്റബിൾ ഡവലപ്മെന്റ് അസോസിയേഷൻ എന്നിവയുമായി സഹകരിക്കുന്നതിനുള്ള ധാരണാപത്രത്തിലും ഒപ്പുവെച്ചു. ശാസ്ത്രജ്ഞനും കാശ്മീരിലെ ബഡ്ഗാം കൃഷി വിജ്ഞാനകേന്ദ്രം മേധാവിയുമായ ഡോ. ബിലാൽ അഹമ്മദ് ലോണിനെ ആദരിച്ച ചടങ്ങിൽ തൃശൂർ കോ ഓപ്പറേറ്റീവ് സൊസൈറ്റി ജോയിന്റ് രജിസ്ട്രാർ പി രാമചന്ദ്രൻ, ഇസാഫ് കോ ഓപ്പറേറ്റീവ് സൊസൈറ്റി സിഎഫ്ഒ സുനിൽ ജി നമ്പൂതിരി, എക്സിക്യുട്ടീവ് വൈസ് പ്രസിഡന്റ് ബീന ജോർജ് എന്നിവർ പ്രസംഗിച്ചു.
