ചെർപ്പുളശ്ശേരി: പക്ഷികളുടെ വർണവൈവിധ്യവും പ്രകൃതിയുടെ സൗന്ദര്യവും വിദ്യാർഥികൾക്ക് പരിചയപ്പെടുത്തുക എന്ന ലക്ഷ്യത്തോടെ കരുമാനാംകുറുശ്ശി ഗവ. എൽ.പി. സ്കൂളിൽ ‘നിറമുള്ള കൂട്ടുകാർ’ എന്ന പേരിൽ പക്ഷിനിരീക്ഷണ ക്ലാസും പക്ഷികളുടെ ഫോട്ടോ പ്രദർശനവും സംഘടിപ്പിച്ചു.
കുട്ടികളിൽ പ്രകൃതിസ്നേഹവും പക്ഷികളോടുള്ള കരുതലും വളർത്തുന്നതിനൊപ്പം ജൈവവൈവിധ്യ സംരക്ഷണത്തിന്റെ പ്രാധാന്യം ബോധ്യപ്പെടുത്തുക എന്ന ലക്ഷ്യത്തോടെയായിരുന്നു പരിപാടി.
ചെർപ്പുളശ്ശേരി നഗരസഭ ക്ഷേമകാര്യ സ്ഥിരംസമിതി ചെയർമാനും വാർഡ് കൗൺസിലറുമായ എം.ആർ. രാജേഷ് പരിപാടി ഉദ്ഘാടനം ചെയ്തു. പി.ടി.എ. പ്രസിഡന്റ് മനീഷ അധ്യക്ഷത വഹിച്ചു.
വന്യജീവി ഫോട്ടോഗ്രാഫറും അധ്യാപകനും അഭിനേതാവുമായ ബാലകൃഷ്ണൻ ആനമങ്ങാട് മുഖ്യാതിഥിയായി പങ്കെടുത്തു. പക്ഷികളുടെ വൈവിധ്യമാർന്ന ലോകത്തെക്കുറിച്ചും അവയുടെ ആവാസവ്യവസ്ഥയെക്കുറിച്ചും വിദ്യാർഥികൾക്ക് അറിവ് പകരുന്നതായിരുന്നു പക്ഷിനിരീക്ഷണ ക്ലാസ്.
പരിസ്ഥിതി പ്രവർത്തകൻ ഗോവിന്ദൻ വീട്ടിക്കാട്, പ്രധാനാധ്യാപകൻ രാധാകൃഷ്ണൻ, മൈഥിലി എന്നിവരും രക്ഷിതാക്കളുടെ പ്രതിനിധികളും ആശംസകൾ നേർന്നു സംസാരിച്ചു.
വന്യജീവി ഫോട്ടോഗ്രാഫി, അധ്യാപനം, അഭിനയം എന്നീ മേഖലകളിലെ സംഭാവനകൾ പരിഗണിച്ച് ബാലകൃഷ്ണൻ ആനമങ്ങാടിനെ സ്കൂളിന്റെ ആഭിമുഖ്യത്തിൽ ആദരിച്ചു. വാർഡ് കൗൺസിലർ എം.ആർ. രാജേഷ് അദ്ദേഹത്തെ പൊന്നാട അണിയിച്ചു.
തുടർന്ന് സംഘടിപ്പിച്ച പക്ഷികളുടെ ഫോട്ടോ പ്രദർശനം വിദ്യാർഥികൾക്കും രക്ഷിതാക്കൾക്കും കൗതുകവും വിജ്ഞാനവും പകരുന്ന അനുഭവമായി. വിവിധയിനം പക്ഷികളുടെ രൂപഭംഗിയും വർണവൈവിധ്യവും അടുത്തറിയാനുള്ള അവസരമാണ് പ്രദർശനത്തിലൂടെ ഒരുക്കിയത്.
വിദ്യാർഥികളും അധ്യാപകരും രക്ഷിതാക്കളും നാട്ടുകാരും പരിപാടിയിൽ സജീവമായി പങ്കെടുത്തു. പാഠപുസ്തകങ്ങൾക്കപ്പുറം പ്രകൃതിയെ അടുത്തറിയാനും പക്ഷികളെയും അവയുടെ ആവാസവ്യവസ്ഥയെയും സ്നേഹിക്കാനും കുട്ടികളെ പ്രേരിപ്പിക്കുന്ന ശ്രദ്ധേയമായ പഠനാനുഭവമായി ‘നിറമുള്ള കൂട്ടുകാർ’ മാറി.