ചെർപ്പുളശ്ശേരി: ചെർപ്പുളശ്ശേരിയിൽ നടക്കുന്ന ബാലസംഘം ജില്ലാ സമ്മേളനത്തിന്റെ ഭാഗമായി ബാലസംഘം കാറൽമണ്ണ വില്ലേജ് കമ്മിറ്റിയുടെ നേതൃത്വത്തിൽ സംഘടിപ്പിച്ച സൗഹൃദ ഫുട്ബോൾ ടൂർണമെന്റ് ആവേശകരമായി സമാപിച്ചു.
കരുമാനാംകുറുശ്ശി സ്പോർട്സ് അക്കാദമി ഗ്രൗണ്ടിൽ രണ്ടുദിവസങ്ങളിലായി നടന്ന ടൂർണമെന്റിൽ വിവിധ ടീമുകളിലെ കായികപ്രതിഭകൾ മാറ്റുരച്ചു. കുട്ടികളിൽ കായികാഭിരുചിയും സൗഹൃദവും കൂട്ടായ്മയും വളർത്തുക എന്ന ലക്ഷ്യത്തോടെയാണ് ടൂർണമെന്റ് സംഘടിപ്പിച്ചത്.
ചെർപ്പുളശ്ശേരി നഗരസഭ സ്റ്റാൻഡിങ് കമ്മിറ്റി ചെയർമാൻ എം. ആർ. രാജേഷ് ടൂർണമെന്റ് ഉദ്ഘാടനം ചെയ്തു. ഫുട്ബോൾ പരിശീലകരായ ഭദ്രൻ, രമേഷ്, ഹൃതിക് എന്നിവരുടെ മേൽനോട്ടത്തിലായിരുന്നു മത്സരങ്ങൾ നടന്നത്.
ആവേശം നിറഞ്ഞ ഫൈനൽ മത്സരത്തിൽ ആർ.ബി.എഫ്.സി. പന്നിയംകുറുശ്ശിയും 29 മെയിൽ റൈസിങ് സ്റ്റാറും തമ്മിൽ ഏറ്റുമുട്ടി. മികച്ച പ്രകടനം കാഴ്ചവെച്ച ആർ.ബി.എഫ്.സി. പന്നിയംകുറുശ്ശി ടീം വിജയികളായി കിരീടം സ്വന്തമാക്കി.
സമാപന സമ്മേളനത്തിൽ ബാലസംഘം ഏരിയ കൺവീനർ സജു വിജയികൾക്ക് ഉപഹാരം സമ്മാനിക്കുകയും അഭിനന്ദനങ്ങൾ അറിയിക്കുകയും ചെയ്തു. വരുന്ന 7, 8 തീയതികളിൽ ചെർപ്പുളശ്ശേരിയിൽ നടക്കുന്ന ബാലസംഘം ജില്ലാ സമ്മേളനത്തിൽ എല്ലാവരും പങ്കാളികളാകണമെന്നും അദ്ദേഹം അഭ്യർത്ഥിച്ചു.
ടൂർണമെന്റിൽ പങ്കെടുത്ത മുഴുവൻ ടീമുകൾക്കും സംഘാടകർ നന്ദി അറിയിച്ചു. മത്സരങ്ങൾ നടത്തുന്നതിനായി ഗ്രൗണ്ടും സൗകര്യങ്ങളും ഒരുക്കിനൽകിയ കരുമാനാംകുറുശ്ശി സ്പോർട്സ് അക്കാദമിയെയും മത്സരങ്ങൾ നിയന്ത്രിച്ച റഫറിമാരായ ഭദ്രൻ, കിച്ചു, രമേഷ്, വിപിൻ എന്നിവരെയും എം. ആർ. രാജേഷ് അഭിനന്ദിച്ചു.
കുട്ടികളുടെ കായികമികവും മത്സരാവേശവും സൗഹൃദവും ഒത്തുചേർന്ന ടൂർണമെന്റ് ബാലസംഘം ജില്ലാ സമ്മേളനത്തിന് മുന്നോടിയായുള്ള ശ്രദ്ധേയമായ പരിപാടിയായി മാറി.