ദുബായ്: വസ്ത്രധാരണത്തിന്റെ പേരിൽ സമൂഹമാധ്യമങ്ങളിൽ ഉയർന്ന വിമർശനങ്ങൾക്കിടെ അതേ വസ്ത്രത്തിലുള്ള പുതിയ ഫോട്ടോഷൂട്ട് ചിത്രങ്ങൾ പങ്കുവെച്ച് നടി നസ്രിയ നസീം. സൂര്യ നായകനാകുന്ന പുതിയ തമിഴ് ചിത്രം ‘സീൻ’ സിനിമയുടെ പ്രമോഷനുമായി ബന്ധപ്പെട്ട് ദുബായിൽ നടന്ന ചടങ്ങിൽ നസ്രിയ ധരിച്ച വസ്ത്രമാണ് വിവാദങ്ങൾക്ക് വഴിവെച്ചത്.
ഒലിവ് പച്ചനിറത്തിലുള്ള ഓഫ് ഷോൾഡർ ഗൗൺ ധരിച്ചാണ് നസ്രിയ ചടങ്ങിൽ പങ്കെടുത്തത്. പരിപാടിയുടെ ചിത്രങ്ങളും വീഡിയോകളും സമൂഹമാധ്യമങ്ങളിൽ പ്രചരിച്ചതോടെ നടിയുടെ വസ്ത്രധാരണത്തെ വിമർശിച്ച് ഒരു വിഭാഗം രംഗത്തെത്തി. നസ്രിയയുടെ പതിവ് വസ്ത്രധാരണരീതിയിൽനിന്നുള്ള മാറ്റം അംഗീകരിക്കാനാകില്ലെന്ന തരത്തിലുള്ള പ്രതികരണങ്ങൾക്കൊപ്പം വ്യക്തിപരമായ അധിക്ഷേപങ്ങളും ഉയർന്നു.
എന്നാൽ വിമർശനങ്ങൾക്ക് നേരിട്ട് വിശദീകരണം നൽകുന്നതിനു പകരം അതേ വസ്ത്രത്തിൽ നടത്തിയ മനോഹരമായ ഫോട്ടോഷൂട്ട് ചിത്രങ്ങൾ നസ്രിയ തന്റെ ഇൻസ്റ്റഗ്രാം അക്കൗണ്ടിൽ പങ്കുവെച്ചു. ‘സീൻ’ എന്ന അടിക്കുറിപ്പോടെയാണ് ചിത്രങ്ങൾ പ്രസിദ്ധീകരിച്ചത്. വിമർശനങ്ങൾക്ക് നസ്രിയ നൽകിയ ആത്മവിശ്വാസത്തോടെയുള്ള മറുപടിയായാണ് ആരാധകർ ഈ നീക്കത്തെ വിലയിരുത്തുന്നത്.
നസ്രിയയുടെ പുതിയ ചിത്രങ്ങൾക്ക് സിനിമാലോകത്തുനിന്നും വലിയ പിന്തുണയാണ് ലഭിക്കുന്നത്. നടൻ നസ്‌ലിൻ, സംവിധായകൻ ജിത്തു മാധവൻ, നടിമാരായ ശ്രിന്ദ, അർച്ചന കവി, മീര നന്ദൻ, ആൻ അഗസ്റ്റിൻ, അനാർക്കലി നാസർ തുടങ്ങിയവർ നസ്രിയയുടെ പുതിയ ലുക്കിനെ പ്രശംസിച്ച് രംഗത്തെത്തി.
ഇതിനിടെ ധനുഷ് നായകനായ ‘നയ്യാണ്ടി’ എന്ന തമിഴ് ചിത്രവുമായി ബന്ധപ്പെട്ട് 2013ൽ ഉയർന്ന വിവാദവും ചിലർ വീണ്ടും ചർച്ചയാക്കി. തന്റെ അനുമതിയില്ലാതെ ബോഡി ഡബിളിനെ ഉപയോഗിച്ച് രംഗങ്ങൾ ചിത്രീകരിച്ചെന്ന നസ്രിയയുടെ അന്നത്തെ പരാതിയാണ് വീണ്ടും സമൂഹമാധ്യമങ്ങളിൽ ഉയർന്നത്. എന്നാൽ സിനിമയിലെ ദൃശ്യങ്ങൾ ചിത്രീകരിക്കുന്നതിനുള്ള സമ്മതവും വ്യക്തിപരമായ വസ്ത്രധാരണ സ്വാതന്ത്ര്യവും വ്യത്യസ്ത വിഷയങ്ങളാണെന്ന അഭിപ്രായവും ഉയരുന്നുണ്ട്.
പന്ത്രണ്ട് വർഷത്തെ ഇടവേളയ്ക്കുശേഷം നസ്രിയ തമിഴ് സിനിമയിലേക്ക് തിരിച്ചെത്തുന്ന ചിത്രമാണ് ‘സീൻ’. ജിത്തു മാധവൻ സംവിധാനം ചെയ്യുന്ന ചിത്രത്തിൽ സൂര്യയ്ക്കും നസ്രിയയ്ക്കുമൊപ്പം നസ്‌ലിനും പ്രധാന വേഷത്തിലെത്തുന്നു.
ദുബായിലെ പ്രമോഷൻ ചടങ്ങിൽ സംസാരിക്കവേ, താൻ വളർന്നതും പഠിച്ചതും ദുബായിലാണെന്നും ഇവിടേക്കുള്ള വരവ് സ്വന്തം വീട്ടിലേക്ക് തിരിച്ചെത്തുന്നതുപോലെയാണെന്നും നസ്രിയ പറഞ്ഞിരുന്നു. സൂര്യയ്ക്കൊപ്പം അഭിനയിക്കാൻ കഴിഞ്ഞതിലുള്ള സന്തോഷവും താരം പങ്കുവെച്ചു.
നവംബർ ആറിനാണ് ചിത്രം തിയറ്ററുകളിൽ എത്താൻ നിശ്ചയിച്ചിരിക്കുന്നത്.
അതേസമയം, നസ്രിയയുടെ വസ്ത്രധാരണത്തെ ചൊല്ലിയുള്ള വിവാദം സിനിമാതാരങ്ങളുടെ വ്യക്തിസ്വാതന്ത്ര്യത്തെക്കുറിച്ചും സ്ത്രീകളുടെ വസ്ത്രധാരണത്തിൽ സമൂഹം നടത്തുന്ന ഇടപെടലുകളെക്കുറിച്ചുമുള്ള ചർച്ചകൾക്കും വഴിതുറന്നിരിക്കുകയാണ്.
സിനിമ വാർത്ത, അനുഗ്രഹ വിഷൻ ന്യൂസ്