കോട്ടയം: അപൂർവ ആയുർവേദ കൈയെഴുത്തുപ്രതികളുടെയും ഇന്ത്യയിലെ പാരമ്പര്യ വൈദ്യശാസ്ത്ര വിജ്ഞാനത്തിന്റെയും സംരക്ഷണം, ഡിജിറ്റൈസേഷൻ, രേഖപ്പെടുത്തൽ എന്നിവ ലക്ഷ്യമിട്ട് കോട്ടയത്ത് ദേശീയ സിമ്പോസിയം സംഘടിപ്പിക്കുന്നു. “Rare Ayurvedic Manuscripts & Repositories in India” എന്ന വിഷയത്തിൽ സെവാധി മ്യൂസിയം ആൻഡ് ഇൻഡോളജിക്കൽ റിസർച്ച് ഇൻസ്റ്റിറ്റ്യൂട്ടിന്റെ നേതൃത്വത്തിലാണ് പരിപാടി.
ഓഗസ്റ്റ് 14ന് രാവിലെ 10ന് കോട്ടയം കുമാരനെല്ലൂരിലെ സേവാധി മ്യൂസിയം ആൻഡ് ഇൻഡോളജിക്കൽ റിസർച്ച് ഇൻസ്റ്റിറ്റ്യൂട്ടിലാണ് സിമ്പോസിയം നടക്കുക.
പരിപാടിയുടെ ഭാഗമായി സെൻട്രൽ കൗൺസിൽ ഫോർ റിസർച്ച് ഇൻ ആയുർവേദിക് സയൻസസ് (CCRAS)-ന്റെ കീഴിലുള്ള നാഷണൽ ഇൻസ്റ്റിറ്റ്യൂട്ട് ഓഫ് ഇന്ത്യൻ മെഡിക്കൽ ഹെറിറ്റേജ് (NIIMH), ഹൈദരാബാദുമായി സെവാധി മ്യൂസിയം ആൻഡ് ഇൻഡോളജിക്കൽ റിസർച്ച് ഇൻസ്റ്റിറ്റ്യൂട്ട് ആയുർവേദ കൈയെഴുത്തുപ്രതികളുടെ സംരക്ഷണത്തിനായി ധാരണാപത്രം (MoU) ഒപ്പുവയ്ക്കും.
ആയുർവേദ വിജ്ഞാന പൈതൃകത്തിലേക്ക് ശ്രദ്ധ
CCRAS ഡയറക്ടർ ജനറൽ പ്രൊഫ. (വൈദ്യ) രവീന്ദ്രനാരായൺ ആചാര്യയാണ് സിമ്പോസിയത്തിലെ ആദ്യ പ്രഭാഷണം നടത്തുന്നത്. “കൈയെഴുത്തുപ്രതികളിൽ നിന്ന് ആരോഗ്യ നവീകരണത്തിലേക്ക്: മനുഷ്യൻ, മൃഗം, സസ്യം, പരിസ്ഥിതി ആരോഗ്യം എന്നിവയ്ക്കായുള്ള ഇന്ത്യയുടെ ആയുർവേദ വിജ്ഞാന പൈതൃകം പ്രയോജനപ്പെടുത്തൽ” എന്നതാണ് വിഷയം.
NIIMH ഹൈദരാബാദിലെ അസിസ്റ്റന്റ് ഡയറക്ടർ (ഇൻചാർജ്) ഡോ. ഗോലി പെഞ്ചല പ്രസാദ് എം.ഡി. (ആയു.), പി.എച്ച്.ഡി. രണ്ടാം പ്രഭാഷണം നടത്തും. “ആയുഷ് ചികിത്സാ സമ്പ്രദായങ്ങളുടെ ദേശീയ ശേഖരം: CCRAS-NIIMH-ൽ ഇന്ത്യയുടെ സമ്പന്നമായ വൈദ്യപൈതൃകം സംരക്ഷിക്കൽ” എന്ന വിഷയത്തിലാണ് പ്രഭാഷണം.
ആയുർവേദത്തിന്റെ പുരാതന വിജ്ഞാനശേഖരമായ കൈയെഴുത്തുപ്രതികൾ സംരക്ഷിക്കുകയും ഡിജിറ്റൈസ് ചെയ്യുകയും രേഖപ്പെടുത്തുകയും ഫീൽഡ് സർവേ നടത്തുകയും കാറ്റലോഗ് ചെയ്യുകയും ചെയ്യുന്നതിന് കൂടുതൽ പ്രാധാന്യം നൽകുകയാണ് പരിപാടിയുടെ ലക്ഷ്യം.
കേരളത്തിൽ ഉൾപ്പെടെ വിവിധ ഇടങ്ങളിൽ ലഭ്യമായ അപൂർവ ആയുർവേദ കൈയെഴുത്തുപ്രതികളെ ശാസ്ത്രീയമായി രേഖപ്പെടുത്തി ഭാവിതലമുറയ്ക്കായി സംരക്ഷിക്കുന്നതിനുള്ള പ്രവർത്തനങ്ങൾക്ക് ഈ ധാരണാപത്രം കൂടുതൽ ശക്തി പകരുമെന്നാണ് പ്രതീക്ഷിക്കുന്നത്.