ശബ്ദ വിസ്മയത്തിന്റെ ചരിത്രവഴികളും വർത്തമാനകാലത്തെ ബാലനും

മലയാള സിനിമയുടെ ചരിത്രതാളുകളിൽ ‘ബാലൻ’ എന്ന പേരിന് സുവർണ്ണാക്ഷരങ്ങളുടെ തിളക്കമുണ്ട്. തൊണ്ണൂറോളം വർഷങ്ങൾക്ക് മുൻപ്, നിശബ്ദതയുടെ ചട്ടക്കൂടുകൾ തകർത്ത് മലയാള സിനിമ സംസാരിക്കാൻ തുടങ്ങിയത് ഇതേ പേരിൽ ഒരുങ്ങിയ ഒരു വിസ്മയത്തിലൂടെയായിരുന്നു. ഇന്ന്, വർത്തമാനകാലത്തെ ഏറ്റവും പ്രഗത്ഭരായ ചലച്ചിത്രപ്രവർത്തകർ അതേ പേരിൽ മറ്റൊരു ദൃശ്യവിരുന്ന് തിയേറ്ററുകളിൽ എത്തിക്കുമ്പോൾ, അത് മലയാള ചലച്ചിത്ര ചരിത്രത്തിന്റെ മനോഹരമായ ഒരു വട്ടപ്പൂജ്യമായി മാറുകയാണ്.

ആദ്യ ശബ്ദചിത്രം ബാലൻ: അന്ന് പിറന്ന ചരിത്രം
മലയാളത്തിലെ ആദ്യത്തെ സംസാരിക്കുന്ന ചിത്രമായ ‘ബാലൻ’ 1938 ജനുവരി 19-നാണ് തിയേറ്ററുകളിലെത്തിയത്. സേലം മോഡേൺ തിയേറ്റേഴ്സിന്റെ ബാനറിൽ ടി. ആർ. സുന്ദരം നിർമ്മിച്ച്, എ. സുന്ദരം പിള്ള സംവിധാനം ചെയ്ത ഈ ചിത്രം മലയാള സിനിമയുടെ ചരിത്രത്തെ തന്നെ തിരുത്തിക്കുറിച്ചു. എ. മുത്തുസ്വാമി ഐയർ ആയിരുന്നു ചിത്രത്തിന്റെ ഛായാഗ്രാഹകൻ. ജോസഫ് ചെല്ലയ്യ എഴുതിയ ‘വിധി ആൻഡ് വിധി’ എന്ന കഥയെ ആസ്പദമാക്കി മുതുകുളം രാഘവൻ പിള്ളയാണ് ചിത്രത്തിന് തിരക്കഥയും സംഭാഷണവും ഒരുക്കിയത്.
കെ. കെ. അരൂർ, എം. കെ. കമലം എന്നിവർ പ്രധാന വേഷങ്ങളിലെത്തിയ ചിത്രം രണ്ട് അനാഥ സഹോദരങ്ങളുടെ കഥയാണ് പറഞ്ഞത്. ക്രൂരയായ രണ്ടാനമ്മയുടെ പീഡനങ്ങളിൽ നിന്നും അവഗണനകളിൽ നിന്നും തന്റെ അനിയത്തിയെ സംരക്ഷിക്കാൻ ജ്യേഷ്ഠനായ ബാലൻ നടത്തുന്ന പോരാട്ടങ്ങളായിരുന്നു ചിത്രത്തിന്റെ ഇതിവൃത്തം. ‘ഹലോ മൈ ഡിയർ പപ്പ’ എന്ന പ്രശസ്തമായ ആദ്യ സംഭാഷണം മലയാളി പ്രേക്ഷകർ അത്ഭുതത്തോടെയാണ് തിയേറ്ററുകളിൽ കേട്ടത്. സാങ്കേതിക പരിമിതികൾ ഏറെയുണ്ടായിരുന്ന ആ കാലഘട്ടത്തിൽ വലിയ പ്രൊഡക്ഷൻ ചിലവിലാണ് ചിത്രം പൂർത്തിയായത്. ചിത്രം തിയേറ്ററുകളിൽ വൻ വിജയമാവുകയും, മലയാളികൾ സ്വന്തം ഭാഷയിൽ സംസാരിക്കുന്ന സിനിമയെ ഇരുകൈയും നീട്ടി സ്വിക്കുകയും ചെയ്തു.
പുതിയ കാലത്തെ ‘ബാലൻ ദി ബോയ്’: അമ്മയെ തേടിയുള്ള മകന്റെ അതിജീവനയാത്ര
വർഷങ്ങൾക്കിപ്പുറം മലയാള സിനിമയിലെ മുൻനിര സംവിധായകനായ ചിദംബരം തന്റെ പുതിയ ചിത്രത്തിന് ‘ബാലൻ – ദി ബോയ്’ എന്ന് പേരിടുമ്പോൾ പ്രേക്ഷകരിൽ വലിയ പ്രതീക്ഷകളാണ് ഉയർന്നത്. സമകാലിക സിനിമയിലെ പ്രതിഭകൾ ഒത്തുചേരുന്ന ഒരു സൈക്കോളജിക്കൽ ത്രില്ലർ ഡ്രാമയായാണ് ഈ ചിത്രം രൂപപ്പെടുത്തിയിരിക്കുന്നത്. പല കാലങ്ങളിൽ, പല നാടുകളിൽ, പുതിയ പുതിയ ഐഡന്റിറ്റികളുമായി ജീവിക്കേണ്ടി വരുന്ന ഒരു അമ്മയുടെയും മകന്റെയും തീവ്രമായ അതിജീവനത്തിന്റെ കഥയാണ് സിനിമ പറയുന്നത്.
കാണാതായ തന്റെ അമ്മയെ അന്വേഷിച്ച് ഇറങ്ങുന്ന മകന്റെ യാത്രയും തുടർന്നുണ്ടാകുന്ന സസ്പെൻസുകളും നിറഞ്ഞതാണ് ചിത്രത്തിന്റെ ഇതിവൃത്തം. പുതുമുഖങ്ങളായ ആദിശേഷൻ കെ. ആർ, ഫാർസാന പാലത്തിങ്കൽ എന്നിവർ പ്രധാന കഥാപാത്രങ്ങളായി എത്തുമ്പോൾ, അവരുടെ തകർപ്പൻ പ്രകടനങ്ങൾ തന്നെയാണ് ചിത്രത്തിന്റെ ജീവൻ. സൂപ്പർ താരം ടൊവിനോ തോമസ് ചിത്രത്തിൽ ഒരു സുപ്രധാനമായ അതിഥി വേഷത്തിൽ എത്തുമ്പോൾ, ജീൻ പോൾ ലാൽ, ഗിരീഷ് എ. ഡി, മുഹമ്മദ് സിനാൻ തുടങ്ങിയ വലിയൊരു താരനിരയും ചിത്രത്തിന്റെ ഭാഗമായി അണിനിരക്കുന്നു.
അണിയറയിലെ പ്രതിഭകളും ലോകോത്തര നിർമ്മാണവും
‘മഞ്ഞുമ്മൽ ബോയ്‌സ്’ എന്ന തരംഗത്തിന് ശേഷം ചിദംബരം സംവിധാനം ചെയ്യുന്ന ഈ ചിത്രത്തിന് തിരക്കഥയൊരുക്കിയിരിക്കുന്നത് ‘ആവേശം’ ഫെയിം ജിത്തു മാധവനാണ്. ഈ രണ്ടു ഹിറ്റ് മേക്കർമാരുടെ ഒത്തുചേരൽ തന്നെയാണ് സിനിമയുടെ ഏറ്റവും വലിയ ആകർഷണം. സുഷിൻ ശ്യാമിന്റെ പശ്ചാത്തല സംഗയീതവും ഗാനങ്ങളും ചിത്രത്തിന്റെ വൈകാരികമായ അന്തരീക്ഷത്തെ മറ്റൊരു തലത്തിലേക്ക് ഉയർത്തുന്നു. ഷൈജു ഖാലിദിന്റെ അതിമനോഹരമായ ഫ്രെയിമുകളും വിവേക് ഹർഷന്റെ എഡിറ്റിങ്ങും ചിത്രത്തിന് രാജ്യാന്തര നിലവാരമുള്ള ദൃശ്യഭംഗി നൽകുന്നുണ്ട്.
കെ. V. എൻ പ്രൊഡക്ഷൻസും തെസ്പിയൻ ഫിലിംസും ചേർന്നാണ് ഈ വലിയ പ്രൊജക്റ്റ് സ്പോൺസർ ചെയ്ത് നിർമ്മിച്ചിരിക്കുന്നത്. ഇന്ത്യൻ സിനിമയിലെ പ്രമുഖ താരങ്ങളായ സൂര്യ, അജയ് ദേവ്ഗൺ, നാഗ ചൈതന്യ, രാജ് ബി. ഷെട്ടി എന്നിവർ ചേർന്നാണ് വിവിധ ഭാഷകളിൽ ചിത്രത്തിന്റെ ട്രെയിലർ പുറത്തിറക്കിയത് എന്നതും ഈ നിർമ്മാണ പങ്കാളിത്തത്തിന്റെ വ്യാപ്തി വ്യക്തമാക്കുന്നു. മലയാളത്തിന് പുറമെ തമിഴ്, തെലുങ്ക്, കന്നഡ, ഹിന്ദി ഭാഷകളിൽ പാൻ-ഇന്ത്യൻ തലത്തിലാണ് ചിത്രം തിയേറ്ററുകളിൽ എത്തിയത്.
പ്രേക്ഷക പ്രതികരണവും പുതിയ സിനിമാ അനുഭവവും
റിലീസിന് മുന്നോടിയായി പ്രിവ്യൂ കണ്ട പ്രശസ്ത സംവിധായകൻ പ്രിയദർശൻ ഉൾപ്പെടെയുള്ളവർ ചിത്രത്തെ സമീപകാലത്തെ ഏറ്റവും മികച്ച സിനിമാക്കാഴ്ച എന്നാണ് വിശേഷിപ്പിച്ചത്. തിയേറ്ററുകളിൽ നിന്നും പ്രേക്ഷകരിൽ നിന്നും മികച്ച പ്രതികരണമാണ് ചിത്രത്തിന് ലഭിക്കുന്നത്. വെറുമൊരു ത്രില്ലർ എന്നതിലുപരി അമ്മയും മകനും തമ്മിലുള്ള വൈകാരികമായ ആത്മബന്ധം പ്രേക്ഷകരുടെ ഉള്ളുലയ്ക്കുന്ന രീതിയിൽ അവതരിപ്പിക്കാൻ സംവിധായകന് കഴിഞ്ഞിട്ടുണ്ട്.
ആദ്യകാലത്ത് ബ്ലാക്ക് ആൻഡ് വൈറ്റ് കാഴ്ച്ചകളിൽ ശബ്ദത്തിന്റെ വിപ്ലവം തീർത്ത പഴയ ബാലനിൽ നിന്നും, ഇന്ന് വൈകാരികമായ തീക്ഷ്ണതയും സാങ്കേതിക തികവും കൊണ്ട് പ്രേക്ഷകരെ വിസ്മയിപ്പിക്കുന്ന പുതിയ ബാലനിലേക്ക് എത്തുമ്പോൾ മലയാള സിനിമയുടെ വളർച്ചയുടെ മനോഹരമായ സാക്ഷ്യപത്രമായി ഈ ഫീച്ചർ ചിത്രം മാറുന്നു.

രഞ്ജിത്ത് എം നിലമ്പൂർ